Shillong, Ïaiong 16: Ka Ïingkashari Meghalaya High Court kala ai jingbit ïa ka Hima Sohra ban lum ïa ka musur ba T.200 ïa ki kali kit mawshun bad kit maw, kiba pyndonkam ïa ka surok na Umdud sha Zero Point ha Bholaganj-Majai Land Custom Station.
Kane ka hukum kala mih ha 13 tarik Ïaiong na ka Ïingkashari bala khlieh da u Justice HS.Thangkhiew haba shong bishar ïa ka mukotduma nala mudui pyrshah ïa ka Hima Sohra bad Hima Sohra Core Committee namar ka jing lum bai musur bad tah sticker ïa ki kali ba khaii mawshun bad khaii mar na Umduh sha Lang Custom Station Bholaganj.
“Ka nongshah mudui no 6 (Hima Sohra) lane lyngba ki briew ba ka ai bor, lada ka Dorbar kam lah ban pynïaid hi, la ai jingbit ban lum ïa ka bai musur ba T. 200 ïa kawei ka kali halor ka jingpyndonkam ïa ka surok (ïa kane ka hukum la pynmih naba ka Hima Sohra ka dei kaba peit bad sumar ïa kane ka surok) ” ong ka Ïing kashari.
Ka Ïingkashari ka ong ba ka Hima Sohra kam lah satia ban lum tam ïa ka musur lane ka jinglum ïa kiwei kiwei ki khajna na ki kali kiba khaii ïa ki marpoh khyndew na kane ka surok na ka musur kaba T. 200 kumba la buh.
“Ki Nongmudui/Nongkhaii ki dei ban iatreilang bad ban ai jingtip lada don kano kano ka jingleh tam sha ka Ïing kashari” ong ka Ïingkashari haba bthah ïa ka Hima Sohra ban buh ïa ki jingkheiñ jingdiah halor ka pisa ba ki ïoh lum na ka musur.
Ka Ïingkashari ka ong ruh ba ka Hima Sohra kam lah satia ban khang ïa kino kino ki kali ba khaii marpoh khyndew kiba don ïa ki permit ban khaii lada kine ki kali kila siew ïa ka bai musur. Ka ong ba kane ka huku kan trei kam tad haduh ka sien shong bishar biang ïa ka mukotduma ha ka 10 tarik Jymmang ban pynmih da kawei pat ka hukum.
Ha kajuh ka por, ka Ïingkashari kala bthah ba ka Hima kam lah shuh ban nang pynmih ïa kino kino ki hukum/jingpynbna lane ban leh ïa kano kano ka kam hapoh ka bor jong ka Hima Sohra Core Committee.
Ka Ïingkashari kala ong ruh ba ka Hima Sohra Core Committee kam lah shuh ban nang pyndonkam ïa ki sticker jong ki kali kiba khaii ïa u mawshun ne u maw na Bholaganj Land Custom Station khamtam ba ïa kine ki sticker la dep ban pynsangeh da ka Hima Sohra.
Ha kajuh ka por, ka Ïingkashari kala bthah ïa ka Sorkar Pdeng bad ka Sorkar Jylla ban file affidavit khamtam halor ka jinglong jingman jong ka surok na Umdud sha Zero Point ha Bholaganj-Majai Land Custom Station. ha lane shuwa ka sien shong bishar ban wan.
