Ka Sorkar ka dei ban pynphai ïa ki shnong kiba ka la khynñiat jubor sha Assam: Enos G Momin

Nongstoiñ, Ïaïong 13: Ka jingdawa jong ki paitbah ka thaiñ Malangkona ïa u Myntri Rangbah bad symbud Myntri Rangbah ka jylla, ban pynphai biang ïa ki shnong kiba la khynñiat sha ka Assam lyngba ka jingïasoi ïa ka soskular pynbeit pud hapdeng ki ar jylla ka la nang jur.
Ha ka sngi balang, ka la don ka jingïaid paitbah kaba la sdang na ka madan jong ka Malangkona Higher Secondary School Siminaguri sha madan shnong Sildubi, ha kaba la ïashim bynta da ki hajar ngut ki paitbah, ryngkat ka jingrah ïa ki lama ïong bad ki placard kiba la thoh ïa ki kyntien ban dawa ïa u Conrad Kongal Sangma bad u bah Prestone Tynsong, ki dei ban pynphai biang ïa ki shnong sha Meghalaya.
Ïa katei ka jingïaid paidbah la pynlong da ka Malangkona Area Development Organisation, ha ryngkat ka jingïatreilang bad ka Joint Action Committee Tarabari sector bad Gizang sector. Haba la poi ha madan jong ka shnong Sildubi la pynlong ïa ka jingïalang, ha kaba la pynïaid da u bah Mogin B Marak President ka MADO bad la ïoh ïa ka jingkren na ki riew rangbah jong ka Tarabarisector, Gizang sector bad u bah Enos G Momin Vice President ka MADO.
U bah Momin haba kren ha katei ka jingïalang u la ong ba katba ka sorkar kam pat pynphai sha Meghalaya ïa ki shnong kiba ka la khynñiat sha Assam, ki paitbah kin ym sangeh ban dawa tad haduh ba kin da ïoh ïa ka jingdawa jong ki. U la ong ba ka jingdawa jong ki ka dei namar ba naduh ba ka sorkar Meghalaya ka la sdang ban pynrung kyrteng ha ka electoral roll da kaba shon dur baroh ki nongshong shnong ki thep vote beit ha Meghalaya.
U la ong ruh ba lada ka sorkar Meghalaya ka khynñiat jubor sha Assam, kin ym treh ban leit bad lada ka sorkar Meghalaya ka pynduh noh ïa ki EPIC jing ki ruh, kin sah beit kum kiba dang hapoh khatphra snem ki bym pat ïoh lad ban thep vote.
Halor katei ka jingeh na ka liang ki nongïalam jong ki sengbhalang ba kynthup ïa ka Garo Student Union, Achik Youth Welfare Organisation, Tura Senior Citizenship Forum, Garo Student Union Khasi hills zone bad kiwei kiwei ki sengbhalang kiba ïatreilang bad ki, kin sa hiar biang sha Malangkona ha ka 16 tarik kaba dei ka sngi saitjaiñ.
Ha katei ka sngi yn pynlong biang ïa ka jingïalang paitbah bad ban shim ïa ka rai ba khatduh kumno kin leh ha kaba ïadei bad katei ka kam pynbeit pud. Ha kajuh ka por kitei ki nongïalam ki kyntu ruh ïa ki sengbhlang na West Khasi Hills, ba kin ïatreilang ha kaba ïadei bad katei ka jingeh, khnang ba ki paitbah katei ka thaiñ kin ïoh ïa ka jingdawa ka jong ki.