Dei ka sorkar ba rim bym ai ïa ka list ki shnong ba shah pynngat sha Assam : CM

Shillong, Iaiong 12 : U Myntri Rangbah ka jylla u Conrad K Sangma u latei pop ha u Myntri Rangbah ba rim ka jylla u Dr Mukul Sangma halor ka kynrum kynram ïa pynbeit pud, da kaba u la ong ba kito ki shnong kiba kwah bad dawa mynta ban neh ha Meghalaya ki dei ki bym don ha ka list jong ki shnong ba ïa kajia ba la ai da ka sorkar ba mynshwa hapoh ka jingialam jongka Congress kata ha u snem 2011 sha ka sorkar Assam.
U Myntri Rangbah ula ong ba ka sorkar ba rim ka la leh bakla shikatdei eh namar ka la ai tang 23 tylli ki list jong ki shnong na ki 29 tylli kiba don hapdeng ka jingïakajia.
U la kyntu ïa u Nongïalam ka Liang Pyrshah u Dr Mukul Sangma ba un bishar bniah ba kaei kaba ka sorkar ba mynta ka rai ban ïa pynbeit ïa u pud u sam ha ki 12 tylli ki jaka ba ïakajia ka dei kaba la pynshong nongrim na kaei ka list kaba la ai sha ka sorkar Assam da u Dr Mukul ha u snem 2011.
Haba ïa kren bad ki lad pathai khubor mynta ka sngi u Conrad K Sangma ula ong ka jingkylli ban bishar bniah biang ïa ka soskular ba la ïasoi hapdeng ka Meghalaya bad Assam ban pynbeit shwa ïa ki 6 tylli ki jaka ba ïakajia na ki 12 tylli kam lah long ne jia long shuh.
“ Nga kwah ban ïathuh ïa ïa phi ba baroh ki jaka kiba kynthup ha ka map kaba la thaw bad pynkhreh ruh ïaka kaiphod ha u snem 2011, ïa kaba ym shym la thaw da ma ngi hynrei ka dei kaba la thaw da ka sorkar ba rim. Baroh kito ki shnong kiba don ha ka map kata 21 na ki 23 tylli ki l a wan phai sha ka Meghalaya” ong u Conrad.
U la ong ba don tang ar tylli ki shnong kiba ym shym la wan phai sha ka Meghalaya kynthup ïa ka ka Malchapara. “ Kiwei ki shnong kiba kwah mynta ban don ha Meghalaya kim shym don ha ka list jongka kaiphod 2011. Kumta ka long kaba eh ïa ka sorkar jylla ban dawa ïa kito ki shnong kiba ym don ha ka list jong u snem 2011” ong u Conrad.
“ Kumba ngim shym la dawa ha u 2011 ïa kitei ki shnong kumta ka jingkylli ban wanrah ïa ki sha ka Meghalaya kam lah long shuh namar eh ban pynkohnguh ïa ka Assam ruh lada ngi dang ïai dawa bun ki shnong kiba ym shym la kynthup ha ka list 2011”ong biang u myntri rangbah.
U la kynnoh ba ka sorkar kaba rim ka la dep ban pynngat beit ïa kito ki shnong kiba ym don ha ka list sha Assam.
Halor ka jingpyrshah jong u Myntri Rangbah ba rim bad Nongïalam ka Liang Pyrshah ïa ka soskular ba la ïasoi hapdeng ki ar jylla u Conrad u la ong biang ba ïa kane ka list pynbeit pud la ai da u Dr Mukul hi haka por ba u long kum u Myntri Rangbah ka jylla. Wat hapoh ka ïing Dorbar ruh ula ïai pynkynmaw ba ïa kane ka list la ai da ka sorkar jongu hadien ba ki la dep bishar bniah bha ïa ka kam da kaba pynlut por bun bun kynta ban pynkhreh ïa ka kaipod.
“ Ha nga shimet nga sngew ba lada ki la leit jurip bad bishar bniah bha ha kato ka por lehse kan ym don jingeh mynta namar lada ki la leit shisha da lade ban leit kylli na ki paid khappud lehse ki shnong ruh kin ym don tang 23 hynrei 29 tylli kiba dei ban wan sha ka Meghalaya” ong u Myntri Rangbah.
Kumta u la ong ba ka jingbakla ka dei beit naduh u snem 2011 ong u Myntri Rangbah da kaba bteng “ Mynta pat ba ngan wanrah ka jingpynkylla ïa kaei kaba la dep ai lypa sha ka sorkar Assam kumba la dawa ka long kaba eh bha. Kumta ka long kaba bakla ïa u Dr Mukul ban ong mynta ba um ïahap ne mynjur bad ka soskular ba la ïasoi namar dei ka jingleh jongu hi. U dei u Myntri Rangbah ha kato ka por ba u ai ïa kane ka list bad mynta da ka jingïakren sngewthuh la lah ban wanrah 21 tylli ki shnong na ki 23 tylli kiba la ai list sha ka Assam. Ban da dei ba ai 29 tylli nga thikna ba ngin ïoh beit la kumno kumno 27 tylli ban pynneh ha Meghalaya”
“Kumta u dei ban sngewthuh shai kdar ba u ruh u ïadon bynta lang ha kane ka jingpynbeit pud naduh kaba sdang namar ngi shu bud ïa kiei ki dienjat jongu namar la shu bud beit ïa ka kaiphod ba u la ai sha ka sorkar Assam. Lada mynta u buh jingkylli halor ka rai balei ba iehnoh ïa kito ki shnong nga tharai u buh jingkylli ïalade hi ïa kaei kaba u la leh ban ym kynthup ïa kitei ki shnong ha ka list ha kato ka por” ong biang u Conrad.
“ Ka long kaei kaei kaba sngewsih ba u dang leh ïa kane mynta pat. U la dei ban phai dien bad bishar ïa kaei kaba u la leh ha kato ka por bad nga tharai u la leit jurip ïa kiba bun ki jaka shwa ban pynkhreh ïa ka kaiphod ha u 2011. Ka long kaei kaei kaba sngewsynei ïa kito kiba sah ha kito ki shnong ki bym hap sha Meghalaya hynrei ngim lah ban leh ei ei namar ngi ruh ngi don la u pud ngim lah ban dang kam palat na ka 23 tylli ki shnong kiba paw ha ka list ba ai sha ka Assam.
U la ong “ Lada dei ba ïoh lad ban dang pynkhreh biang da kawei ka kaipod ngi la dei ban pynkylla lut nadong shadong bad khot ïa ki paid khappud hynrei ïa kane mynta la leh da kaba pynshong nongrim beit ha katei ka kaiphod 2011 na kata ka daw ngi ïakren beit tang halor ki 23 tylli ki shnong bad ïoh pat 21 ban pynneh ha Meghalaya”