Jongksha, Ïaiong 11 : Ka Shnong Jongksha, kaba hap hapoh ka Mawkynrew Block, East Khasi Hills District kaba jngai tang kumba 27 kilometer na ka nongbah Shillong bad kaha don kumba 800 tylli ki longïing, mynta ka sngi 9 tarik u Ïaiong, 2022; ka la ïoh ïa ka jaka ai jinghikai shaphang ka put ka tem kaba la tip kum ka Jien Pyngrope Memorial Music School, ba la plie paidbah da u Dr. R.J.Conville kum u kongsan.
Ïa kane ka jingïalang kaba rit bad kaba ishongkum la pynïaid da u Rev. D. Lyngkhoi bad la ïoh ïa ka jingrwai pdiang sngewbha ïa baroh kiba la ïa wan ha kane ka sngi na ki khynnah bad samla kiba dei ki ba wan shah hikai ha katei ka Music School.
La ïoh ruh ïa ka jingkren maitphang na i Bah M Lamin Gashnga uba dei u Principal bad u trai jong kane ka Jien Pyngrope Memorial Music School ha kaba u la batai lyngkot halor ka nongrim bad ka jingthmu jong kane ka shlem ai jinghikai halor ka tem ka put. Kumjuh ruh la ïoh ïa ka jingkren na u Bah Moses Pyrtuh uba dei u Music Instructor jong ka JPMMS bad kumjuh na u Rangbah Shnong ka Jongksha, Bah Olet Kharsahnoh.
Shuwa ban plie ïa u maw sah jingkynmaw da u Kongsan u Dr. R.J.Cunville, u la ai ïa ka jingkren lyngkot ban long jingkyrkhu da kaba pynshong nongrim na ka ktien U Blei kat kum ka kitab jong ka Jingpynpaw 3:7 kaba ong shaphang jong uta uba don ïa u shabi jong u Dabid. U la ong ruh ba ka ktien shabi lane Key ka don ka jingmut kaba ïajan bha bad ka put ka tem kaba kito kiba ïadonbynta ha ka kam tem ki sngewthuh bha shaphang ki Key ne ki Chord.
U la pynkynmaw ruh ba ka put ka tem ka dei kaba donbor wat ban beh noh ai ki ksuid kiba la wan ban pynjynjar ïa ka jingim jong u Syiem Saul haba u Dabid u tem ïa ka jingtem ka jong u. Bad u Dabid u briew u ba don ïa ka dohnud ka jong U Blei, u dei u nongthoh ïa ka Psalm bad ki jingrwai ïaroh ha ka Baibl.
La ïoh ïa ka jingduwai pynkyntang bad kyrkhu ïa kane ka Music School da u Tbn. D.L.Nongspung. Ha kane ka sngi la pyllait paidbah ruh ïa ka Music Video ba la ai kyrteng “I”U MYNSIEM” ba la rwai da ka kynhun Shema Shillong, da u Rev. R.M.Kharbuki.
La ïoh ruh ïa ka jingrwai kyrpang na u Bah Banteilang Warjri, dkhot jong ka Shema Shillong, ka jingkren ai khublei na i Bah T. Pohshna bad la kyrkhu pynwai da u Rev S.B.Suting.
