Lada ka sorkar ka bakla ban pynbeit ïa ka Langpih Sector, ka jingïakynad kan bthei biang

Nongstoiñ, Ïaïong 11: Ka jingpynbna jong ka sorkar lyngba ki lad pathai khubor ba ha u bnai jylliew, ka jingïakren ban pynbeit ïa u pud u sam na ka bynta ki hynriew tylli ki jaka ïa kajia kiba hap ha ka phase II, kata ki jaka bad ki shnong thaw kiba hap ha ka Block I, Block II bad ka Langpih sector ka la pynsyier mynsiem ïa ki paitbah kiba shnong ha kitei ki shnong khappud.
Ka jingsyier mynsiem jong ki paitbah, ka dei halor ka nongrim ba ki la ïohi ïa ka jingleh donbor jong u Myntri Rangbah ka jylla ïa ki shnong kiba don ha ka thaiñ Malangkona, kiba dang hap hapoh u pud u sam jong ka hima Nonglang Sirdarship. Ka jingleh donbor ka long da kaba ai sngewbha sha ka Assam khlem ka jingtip jong ki nongsynshar hima bad ki paitbah nongshong shnong.
U bah P.Nongshlong sordar jong ka shnong Mawïamsyiem bad kiwei kiwei ki riew rangbah jong ki shnong kiba hap ha ka Langpih sector, u la ong, “Ki paitbah jong ki shong ha katei ka thaiñ kim suk mynsiem shuh ha kine ki sngi, namar ki ar ngut ki Myntri Rangbah jong ki ar jylla kata u Conrad Kongal Sangma bad u Himata Biswa Sarma, ki la dep pyni dalade ba ki dei ki riew synshar donbor kiba ïa syriem bad u Vladimir Putin u President ka Russia”.
U la ong, “Kim sngap satia ïa ka jingai jingmut jong ki Chairman jong ki Regional Committee, kiba la leit ban jurip bad sngap ïa ka sur ki paitbah nongshong shnong la ki kwah ban sah ha Meghalaya ne ki kwah ban leit sha Assam”, bad bynrap, “Ki la leit sha Delhi ban ïasoi ïa ka soskular pynbeit pud khlem da khot lang ïa ki Nongsynshar hima bad Nongsynshar shnong ba kin ïasoi lang ïa ka resolution kaba kin phah sha Delhi”.
Nalor kata kiwei pat ki riew rangbah na ki thaiñ Langpih ki la ong ba lada ka jingïapynbeit ïa ki jaka kiba hap ha ka Langpih sector ba kynthup ïa ka Kamphaduli, Bagjeng, Nawapara, Dronpara Mawïamsyiem, Langpih, Mawdiangsnam, Kyrshai, Umwahsiang, Domtiewsaw, Madanjaïaw, Ïewnongma, Nongmawlong, Nongma, Umwali, Umtap, Umbyrsit bad Mawsikar, ka sorkar kan khynñiat sha Assam kumba ka la leh ïa ki phra tylli ki shnong ha ka thaiñ Malangkona, kiba hap ha u pud u sam jong ka hima Nonglang Siradarship ba ki bym dei ki disputed village, kumba long ki shnong kiba hap ha ka Raidmynsaw, kam don jingartaien ei ei ba ka jingïakynad kaba kham shyrkhei ban ïa kaba long ha u snem 2010, kan bthei biang bad sa katno phew ngut ki mynsiem ba kordor kin duh ei.
Haba kdew ïa ki jingshisha kiba lah ban wanrah ïa katei ka jingïakynad ba kham khraw, ki paitbah ka Raidmynsaw ki la ong ba ha ka thaiñ Malangkona, ym don satia ka jingïaknieh ïa ki kper ki phrah bad ki jaka ki puta, namar ba ki jaitbynriew kiba shong ha katei ka thaiñ ki dei ki Rabha bad Assamese kiba dei ki para nong India. Hynrei ha ki jaka kiba hap ha ka Langpih sector pat ka jingwan knieh jubor ïa ki jaka rep, ki kper ki phrah bad ki jaka puta ki dei ki Nepali ki bym dei satia ki nongshong shnong jong ka ri India hynrei ki dei ki mynder.
Nalor kata ki Nepali kiba wan shong jubor ha katei ka thaiñ ki ïoh ïa ka jingïada ba pura na ki pulit Assam kiba don ha Langpih bad Mawsikar, ha kaba ki dakhol ïa kano kano ka jaka ki pulit ka Meghalaya kiba don ha Langpih, kim nud ban kem bad wat tang ban khot hajir hapoh Camp ruh kim nud satia.
Ki la bynrap ruh ba lada ka jingïapynbeit ïa u pud u sam kam long katkum ka jingkwah jong ki nongshong shnong kiba kwah ban sah ha Meghalaya, ka Langpih kan kylla kum ka madan thma bad ki paitbah kin ym kohnguh shuh ïa ka sorkar lada ka kyntu ba kin ïa shong suk shong saiñ, namar kim kwah satia ba kin kylla long ki mraw ha la ka jong ka jaka.
U bah Birbor Riangtem Secretary ka Hima Nonglang Sirdarship u la ong ba kane ka jingpynbeit pud kumba long mynta, ka dei kaba ki ong ka ‘give policy’ ym ka ‘give and take policy’.
“Naduh nyngkong hi ngi la tharai sniew namar balei ïa ngi la kyntait ?. Ki paidbah ki mad ïa ka jingsngewsih bad ka daw ka dei namar ym shym la kynthup lang ïa ki briew jong ki Hima ha ka Regional Comittte jong ka sorkar, dei na kata ka daw ba ka wan jia kumne”, ong utei u rangbah.
“Ki paidbah jong ki katto katne tylli ki shnong kiba dang hap hapoh ka Hima Nonglang Sirdarship West Khasi Hills District, ha kaba nyngkong, mar syn ïohi bad ïoh sngew ïa ka jingkren u Conrad K.Sangma myntri rangbah ka jylla ha ka por ba u kren ha ka ïing dorbar thawaiñ jong ka jylla Meghalaya, ki la ïa risa bad leh kmen haduh katta katta, kat haduh ba ki la thang shisyndon wat ïa ki bombula. Phewse hadien ka MoU pat ka la long pynban da khongpong bad ka la pynkthang hi ngak”.