Haba ki la ïa wan ruh ha ka ïing ki la ïohi ïa u ta u khunlung, haba ki la ïadem ki la ïa mane ruh ïa u bad haba ki la ïa law ïa ki jingsong jong ki, ki la ïa tyrwa ai ki jingai ha u ka ksiar bad ïa ka jingiwbih bad ïa ka mir de. (Math 2:11)
Ka ‘KHRITMAS’, ka dei ka sngi rakhe pyndon burom leh kmen ïa ka jingwan longbriew U Trai Jisu sha kane ka pyrthei. Dei tang kane ka jingrakhe pyndon burom ba la rakhe ym tang ma ngi ki Khristan hynrei wat kiba bun ruh ki bym long Khristan. La ngim da tip thikna ïa ka tarik sngi kha jong U, hynrei ngi ngeit skhem ba U Jisu U khun jong U Blei u la wan sha kane ka pyrthei ban ai jingpynim ïa ngi. U angel U Trai u la pynbna, “ha kane ka sngi la kha ïa phi ha ka shnong u David ïa u Nongpynim u ba long u Khrist u ba u trai. (Loukas 2:11)
Ka long ka shisha kaba eh ban pynthikna ïa ka jingsdang jong ka jingrakhe Khristmas. Dei tad haduh u snem 361 hadien u Khrist (AD) ba u Pope Julius u la pynbna ïa ka 25 tarik u December ba kum ka sngi ba la kha ïa U Jisu. Bad dei tad haduh u snem 500 AD ba kham bun na ki Balang ki la ithuh bad pdiang ïa ka.
KI RIEWSTAD
La ai kyrteng ïa kine ki riew stad “Magi” U Herodotus u ïathuh ba nyngkong eh kine ki riewstad ki dei na ka jaidbynriew Media (Median Tribe). Ki dei ki nongshong shnong jong ka hima Persha. Ki la pyrshang ban pynkhyllem ïa ka jingshynshar Persha bad ban synshar da ki jaidbynriew Media, hynrei ki la shah jop noh. Hadien kata ki la kylla long noh ki nonghikai jong ki syiem Persha. Ki la long ruh ki nongïathuhlpa bad ki nongbatai ïa ki jingphohsniew.
Ki long kiba shemphang ha ka jingstad Philosophy, Science bad ki dawai dashin. La ki long ki Jentil, hynrei ki long ki briew kiba bha, kiba stad bad kiba wad bniah ïa ka jingshisha. Ka jingïathuh khana pateng (Eastern Tradition) ka ïathuh ba ha ki por ba mynshwa ki don khat ar ngut, hynrei ki khana pateng hadien pat la ong ba ki don lai ngut. Ka Bible ruh kam shym la thoh ba don lai ngut ki riew stad, hynrei la shim pat ba don lai ngut namar ba don lai jaid ki jingai sngewbha. Ïa kine ki riew stad la tip kyrteng kum u Melchoir, Caspar bad u Balthasar.
Ka jingai ki riewstad : U Seneca u la ïathuh ba ha ka ri Parthia (Iran) ha kito ki por, ka long ka dustur ba uno uno u briew um lah ban ïakynduh ïa u syiem khlem da rah ryngkat bad u ka Jingai sngewbha.
Jingai U Melchoir : Une u dei u riew tymmen u ba la phuh ñiuhkhlieh bad don tmaiñ kiba jrong. U la ai ïa ka ksiar kaba dei eh ban ai kum ïa u syiem. Ïa U Jisu la kha kum u syiem ban synshar da ka jingieit bad jingisnei ym da ka bor.
Ka jingai u Caspar : Une long u Samla bym don tmaiñ, hynrei u don ka khmat kaba sawkyrang. U la wanrah ka jingai ba iwbih. Ïa ka jingiwbih la ju pyndonkam ha ka jingmane bad jingkñia ha ka temple da u Lyngdoh. Ka kam jong u Lyngdoh ka long ban plie ïa ka lynti sha u Blei na ka bynta ki briew.
Ka ktien Latin na ka bynta u lyngdoh ka dei ‘Pontifex’ kaba mut u nongshna ne nongpun jingkieng. U Jisu kum u Lyngdoh U la pun lynti sha u kpa. U Jisu u la ïathuh ha u Thomas, “Nga u ba long kata ka lynti… ym don u ba wan ha u kpa hynrei tang da nga” (Ioan 14:16)
Haba U Jisu u la aiti noh ïa la ka mynsiem halor ka diengphna, te ka jingkah ka temple ka la kat arliang (Math 27:51, Mk. 15:38, Loukas 23:45). Ha ka Testament kaba rim, U Rangbah Lyngdoh u ju leit rung ha ka jaka bakhuid tam jong ka temple shisien shisnem ha ka sngi Jingsiewspah (Day of Atonement) ban pynlong ka jingkñia pynïasuk na ka bynta ki pop ki khun Israel baroh (Leb. 16:34). Haba U Jisu u la aiti la ka mynsiem U la plie ïa ka lynti ka jingpynim sha u kpa. U long U Rangbah Lyngdoh, u da ïasaid na ka bynta ki pop jong ngi (1Ioan 2:1) ha la ka sngi ym shuh tang shi sien shi snem.
Jingai u Balthasar: U long u briew ba la sdang rangbah bad u don ka snieh doh ka bym shai rong (Swarthy). Dei ma u u ba la ai ïa ka mirr. La pyndonkam ïa ka Mirr ban kyllan ïa ka met u briew u ba la ïap. U Jisu u la wan sha ka pyrthei ban shah ïap bad ban pynim ïa kiba pop. (1Tim 1:15)
Ki jingai jong ki riewstad wat lada kim shym la shemphang satia ïa ka jingmut jong kawei pa kawei ka jingai, hynrei ki don ka jingmut kaba khraw shalyndet ïa ka jingim bad jingtrei U Trai Jisu, ha kaba U Blei ha ki jingstad ba phylla u la thmu lypa.
Kine ki riewstad ki la ai ïa la ki jingai ba kordor da ka dohnud ba pyndem, sngewrit bad burom. Haba ngi rakhe Khrismas, aiu ngi ai ïa U ka ban pynsngewbha bad pdiang hun ha khmat jong U ?.
Ka jingkyrkhu U Blei bad ka Khristmas ba suk bad ba kmen ïa phi baroh.
