Shillong, ïaïong : U MLA ka Mawlai u Bah PT Sawkmie ha kane ka sngi Saitjaiñ ba la lah u la pynpaw ka jingsngewkhia ha ka ba ïa dei bad ka hukum ba la pynmih da ka ïingbishar Meghalaya High Court ka ba la ai sha ka Meghalaya Public Service Commission (MPSC) ban pynsangeh shwa ïa ka jingthungkam namar ka jingbym don ka rukom bhah ïa ki kam katkum ki kyndon ka State Reservations Policy na ka daw ka jingbym don satia ka Roster system na ka bynta ban thungkam.
Na ka liang u Bah PT Sawkmie u la pynpaw ïa kane ha ka jingïalang plie ïa ki ar tylli ki surok dewbilat ha Umsohkhlur bad Pdengshnong, ïa kaba u la sam ruh ïa ki tiar shet tiar tiew sha ki 7 tylli ki dong kiba don ha Mawlai Mawroh bad kumjuh ïa ka tiar pyrta shnong (PA System) sha ka Dong Kseh ha ka jingdon lang ki rangbah dong bad kiwei ki paidbah nongshong shnong.Nalor kata u la pynpaw ba bun ki ba aplai kam pulit bad bun kiwei ki kam la shah pynsangeh lut.
Ha kajuh ka por u MLA u la ai ka jingïaroh ïa ka sienjam jong ka Meghalaya High Court kaba la shim haba ïa dei bad ka Marten bad u kyrmen ba ka sorkar kan shimkhia ban pynbeit noh kloi ïa kane ka mat ka ba la slem bha.
U MLA u la pynpaw ruh ka jingsngewkhia halor ka jingbym pat lah ban pynurlong ïa ka Inner Line Party (ILP), watla ka ïingdorbar ka la dep pass ïa ka resolution haba ïa dei bad kane.
Kumjuh u MLA u la kren ruh shaphang ka soskular ba la ïasoi hapdeng ka Meghalaya bad ka Assam haba ïa dei bad ka jingpynbeit pud pynbeit sam. “Ka jingsdang ka la biang hynrei kaba kut kam shym la long kaba sngewtynnat kumba ïohi ïa ki jinglong jingman,” ong u Bah PT Sawkmie haba ïa dei bad u pud u sam.
U Bah PT Sawkmie u la kren ruh halor ka ilekshon MLA ka ban long ha u 2023, ïa kaba u la ong ba ha ka politik donkam ban don bad ka sorkar, “Ha u 2023 ngi hap peit ruh kaba kumno ka jersey ban phong, khnang ban don ha sorkar,” ong u Bah Sawkmie.
“Ha ka sorkar donkam ïa ki nongmihkhmat kiba la ih ne experience ban trei ïa ka kam, kumba ïohi mynta ka jingmih jong ka jingbym biang ha ka jingïapynbeit ïa u pud u sam dei bym don kiba la ih ha ka saiñ hima, ngam ong ba nga dei ma nga uba la ih bha, hynrei nga ong ba ki dei ban don kiba la experience ha ka politik,” bynrap shuh shuh u MLA.
