Jowai, Ïaïong 10: Ki paidriewngeit na kylla ka Ri-Lum Khasi Jaiñtia mynta ka sngi U Blei 10 tarik kila poi sha ka Jingïaseng Samla Khasi Jaiñtia Presbyterian (KJP) Assemble ba shiphew (X) haka Balang Presbyterian Mustem District Mustem, Jowai Presbytery KJP Synod Mihngi, ïa kane ka jingïaseng la sdang ïa ka naduh ka sngi Thohdieng 8 tarik u Ïaïong, halor ka phang kaba ong “Ka jingïaineh ha U Khrist” (Iannnis 15:4).
Ha ka Jingïaseng paidbah mynta ka sngi U Blei ha ka por 1 baje shiteng nohphai la sam ïa ka ktien khubor da u Rev. I.W. Nongsiej ïa kaba la pynshong nongrim na ka Gospel jong u Laukas ka lyngnong ba 19 dkhot ba 28-49, kaba ïathuh shaphang ka jingleit rung u Jisu ‘kum u syiem sha ka nongbah Jerusalem hashwa ban sah narphna ïa u Jisu Khrist’.
U Pastor ula pynsngew shaphang ka jinglongkhuid jong u Kada ïa uba la jied kyrpang ban shong halor jong u da Jisu Khrist bad la ïathuh ruh ba utei u Kada rit uba don ïa ka mynsiem jong ka jinglui lui, uba sngewrit bad uba kohnguh.
Shuh shuh u Pastor ula pynkynmaw ha ka por ba u Jisu u rung sha katei ka nongbah la pdiang sngewbha ïa u da ki paidbah ba bun ba lang kiba la siang ïalade da ki jaiñ bad ki sla dieng ha ka lynti ba u Kada u ïaid.
Kumta u Pastor u kyntu ïa ki para ba ngeit da kaba ong haba U Blei u jied ïa uno uno u shakri jong u, uda peit thuh bha ïa ka jinglong khuid ka Dohnud jong u, khnang ba un lah ban ai ka jingshakri ba bha tam na ka bynta ki kam ba bha jong u Kynrad.
Ha kane ka sngi u Pastor Nongsiej u khot ïa ki paid riewngeit ba kin wan sha jan jong u Trai Jisu da ka Dohnud kaba lui lui, ka jingkohnguh, ka jingsngewrit bad kiba ïaineh haduh ba kut jong ka jingshakri ïa u Nongpynim.
Ha ka por 10:30 mynstep, la ïoh ban sam ïa ka ktien u Blei na u Rev. K. Pariat bad ki jingrwai kyrpang na ki kynhun Choir kiba kynthup na ka Jingïaseng Samla Balang Thadlaboh, Jingïaseng Samla Balang Umsaw Khwan bad ka Jingïaseng Samla Balang Mairang, ha ka por 1:30 nohphai sngi la ïoh ki jingrwai na ki kynhun Choir ba kynthup ïa ka Standing Choir na ka Jingïaseng Samla Synod Sepngi, ka Standing Choir na ka Jingïaseng Samla Synod Mihngi bad la Choir na ka Jingïaseng Samla Balang Mustem.
Katba ha ka jingïaseng ha ka por 6:30 janmiet la sam ka khubor na ka ktien u Blei da Rev. E. F. Sohtun, halor ka subject Jingïaseng Samla KJP Assembly kaba ong “To sumar kyndong ïa kata kaba la aiti ha me” kaba shim na ka (1 Timothi 6:20).
Ha kane ka Jingïaseng naduh ka sngi Thohdieng jong ka 8 tarik u Ïaïong la don ka jingpdiang ïa ki Dkhot bad Delegates, ka Jingïaseng pdiang ha ka por 7 baje janmiet ba la ai jingkren da u Rev. K. Dkhar halor ka phang “Ka jingïaineh ha u Khrist” Ioannis; 15:4). Katba ha ka sngi jong ka 9 tarik la don ka Devotion hapoh ka jingïalam u Rev. V.T.S Langstieh bad ka jingïaseng paidbah ba la kren da u Rev. S.L. Mawblei.
