Ki Chinese Smart Meter ki buh jingma ïa ka tnat sam bording, dawa jingpynshai ka AITC

Shillong, Nohprah, 15: U National Spokesperson jong ka All India Trinamool Congress (AITC) u Saket Gokhale u la kynthah tyngeh ïa ka Sorkar Meghalaya Democratic Alliance (MDA) ba ïalam da ka National People’s Party (NPP) ba ka dei ban ai jingpynshai ha kaba ïadei bad ka jingthmu ban pyntreikam ïa ki Smart Meter ba la thied na ka ri China.
“Ngin ym ailad ïa ka Sorkar MDA ban ïapeiñ ïa ka jingshngaiñ ki paidbah ka jylla Meghalaya tang ban shu pyndap ïa la ka jong ka pla,” la kynthoh National Spokesperson jong ka AITC u Saket Gokhale ha u kyrwoh ba la phah sha ki lad pathai khubor ha ka sngi Palei.
Haba kynthah ïa ka Sorkar MDA, u Gokhale u la ong, “ka long kaba sngewkyndit tang ban ïoh pyndonkam bakla ïa ka pisa da klur tyngka, ka Sorkar MDA ka la ïalehkai bad ka jingshngaiñ ym tang ïa ka Jylla Meghalaya hynrei ïa ka ri baroh kawei da kaba pyndait ïa ki SIM-Card ha ki Smart Meter ba la shna ha ka ri China ha ka kam sam bording ha ka jylla.”
“Kumba ka TMC ka la ju ïai kdew, kine ki Smart Meter na ka ri China ki buh jingma ïa ka jylla Meghalaya ha kaba ki nongtuh ba snar (Hacker) na ka ri China ki lah ban pynlip ïa ka bording, ban khang pyndonkam ïa ki data, ban pynsniew ïa ka jingsam bording ha baroh kawei ka jylla. Nalor kata, kine ki Smart Meter na ka ri China ki dei kiba hap ban thep da ki SIM bad ban pynïasoh bad ka shlem sam bording (Grid). Ka jingsuhsat ka ban jia na ka jingshah thombor ha ki Chinese Hacker kan jia ha baroh kawei ka shlem sam bording,” la kynnoh une u nongïalam ka AITC.
“Ngi kyntu ïa ka Sorkar MDA ba kan ai jingpynshai sha ki padibah ka jylla Meghalaya bad sha ka ri India ba balei kan buh jingma ïa ki jingdon jingem ha ka jylla,” la ong u Gokhale.
U National Spokesperson ula dawa ïa u Symbud Myntri Rangbah bad ïa u Myntri barim jong ka tnat Sam Bording ba u dei ban ai da ka jubab kaba shai sha ki paidbah ka jylla Meghalaya.
“U James Sangma bad u Prestone Tynsong ki dei ban pynpaw ba balei ki shukor sha ki paidbah ka jylla Meghalaya bad ban ïapeiñ bad ka jingshngaiñ ki jingdon jingem jong ka Jylla da kaba pyndait ïa ki Smart Meter na ka ri China khlem da ïoh ïa ka jingmynjur (security approval) kaba long kum ka jingpynkheiñ ïa ki kyndon ba la wanrah da ka Sorkar India ha kaba ïadei bad ka jingpyndonkam ïa ki mar ba la shna ha ka ri China.