Shillong, Nohprah, 15: Ka Federation of Khasi Jaiñtia & Garo People (FKJGP) ka la dawa ïa ka Sorkar Jylla ban ai jingïada mardor ïa ki paidbah nongshong shnong jong ka Umsaw-Lumdorbar, namar ka jingpyni bor jong ki Pulit Assam.
Kane ka jingdawa ka long hadien ba ki Pulit ka Jylla Assam ki la thwet ïa ki nongïalam shnong jong kane ka shnong ba don ha khappud bad ka Jylla Assam halor ka jingkynnoh ba ki dei kiba donkti ban pynpra ïa ki jingker sainar ha ka jaka jong ka tnad Forest ka Sorkar Assam ha kane ka shnong.
Ka Seng ka dawa ban ai jingïada mardor ïa ki nongïalam shnong bad ïa ki nongshong shnong ka Umsaw Lumdorbar ban lait na ki jingjia kumba jia ha Mukroh, ong u Senior Vice President ka FKJGP u Bah Elton C Warjri ha u kyrwoh ba la phah sha ki lad pathai khubor.
“Katkum ki jingtip ba la ïohlum, ka tnad Forest jong ka Sorkar Assam ka la kyntur pud jubor ha kane ka shnong bad kane ka dei ka kam kaba long be-aiñ namarba ka Lumdorbar ka dei ka shnong kaba dang hap hapoh ka jylla Meghalaya,” u la ong.
Ka Seng ka pynrem jur ïa ka jingthwet jong ki Pulit ka Jylla Assam ïa ki nongïalam shnong bad dawa ruh ïa ka Sorkar Jylla ba kan pynsted noh shaid shaid ha ka jingïakren pynbeit pud bad ka Assam.
