Shillong, Nohprah 15: U Myntri ba peit ïa ka tnat ka koit ka khiah jong ka sorkar jylla u James P K Sangma u la ai nam ïa ki ASHA halor ka jingkiew ki longkmie kiba jied ban kha khunlung ha ki jaka sumar ha kine ki ar snem kiba la leit bad kumjuh ka jinglah ban pynduna ïa ka jingkhlad ki khunlung ha ka por ba dang shu kha bad kum juh ki longkmie ba khlad ha ka por ba ki kha khunlung.
Haba kren ha ka ASHA Conference kaba la pyllong na bynta ki ASHA ka East Khasi Hills District bad ka Ri Bhoi District Khasi Hills District u la ong ba ha kine ki ar snem kiba la leit ka jingkiew ki longkmie kiba jied ban kha ha ki jaka sumar na ka 55 per cent sha ka 70 per cent bad kumjuh ka jinghiar ki longkmie bad ki khunlung ba khlad ha ka por ba kha da 30% ka dei beit namar ka jingtrei shitom ki ASHA ban pynsngewthuh ïa ki longkmie kiba armet ba ka long kaba shngaiñ ban kha ha ki jaka sumar ban ïa kaba kha ha ïing.
U la ong ruh ba na ka liang ka sorkar kan sa pyndap noh ïa ki 400 tylli ki post ba tylli jong ki Medical Officer ha kine ki khyndiat por ban wan bad ïathuh ruh ba ka sorkar kan plie thymmai ïa kumba 150 tylli ki Health Sub-center ban ai jingshakri ïa ki paidbah.
U Principal Secretary ka Health and Family Welfare u Sampath Kumar u la ïathuh ba ha ki snem 2005 ka jingdon ki khunlung kiba shim ïa ka tika ka long tang kumba 25% hynrei ha kane ka kynti ka jingdon kiba ïoh ïa ka tika ka la kynjoh sha ka 90% bad kane ka jingkynjoh ka jingdon kiba shim tika ruh ka dei ka jingdon ki ASHA ban pynsngewthuh bad ban trei shitom u la ong.
U la ong ruh ba ka jinghiar kiba ïoh ïa ka jingpang khie shoh rih ruh ka wei ka dei namar ka jingtrei shitom ki ASHA.