Shillong, Nohprah : U MLA ka Mawlai u Bah PT Sawkmie ha ka 12 tarik mynta u bnai u la plie ïa ka surok dewbilat ha Dong Pata, Block B (Lum jingtep) kaba u la mang 3 lak tyngka na ka skhim jong u ka Special Rural Works Programme (SRWP).
Ha kane ka juh ka sngi u MLA u la aiti ruh ïa ki tiar shet tiar tiew, ka duli bad miej na ka bynta ka dong Pata, Mawdatbaki, ba la aiti ha u rangbah dong bah W. R Narry, secretary dong bah Eric Kharkulia, ki longkmie ha ka jingdon ryngkat ki heh UDP Mawlai Circle bad kiwei kiwei.U pyntip ba un sa ai ruh sa ar tyli ki top syntek na ka bynta ka dong.
Haba ai jingkren u Bah PT Sawkmie u la pynpaw ba ka jingleh politic jong ki katto katne kiba don ha bor ïa ki project hapoh ka thaiñ ka la pynduh nong shikatdei eh ïa ki paidbah nongshong shnong khamtam ha kaba ïa dei bad ki Project pynroi ban tap slep ha Mawlai Nongpdeng, Nonglum, Phudmuri bad ka surok ha Mawlai Umjaiur, kaba u briew ba don ha ka bor bad ki bym kwah ba u MLA un ïoh burom ki la pynsuki khnang ïa kine skhim pynroi, haduh ba da pynsangeh syndon kaba la pynduh nong jur ïa ki nongshong shnong kine ki saw shnong.
U MLA ha kane ka sngi u la kren ruh halor ka jingshah siat ïap ha Mukroh, watla ka sorkar ka la pdiang ban thung tohkit da CBI, hynrei haduh mynta ym pat thung ban pyntreikam ïa ka, i kumba ka sorkar ka la shu pynbiej ïa ki sengbhalang bad ïa ki paidbah, watla ka la jan dap lai taïew ei ei mynta ym pat ïohi eiei ba kin leh.
Ha kane ka sngi la ïoh ruh ka jingkren na u secretary dong u bah Eric Khakulia, uba la pynpaw ka jingsngewnguh ïa u MLA bad u la pynkynmaw ruh ha ki por ba la leit u MLA u la noh synñiang kumba 50 tylli ki street light, kiba la long ki jingkyrkhu bah ïa ka dong baroh kawei.
Ha kane ka sngi la ïoh ruh ka jingkren na u Bah Hubert Kharkongor, president, UDP Mawlai Circle, bah Wanseng Jyrwa, working president ka UDP Mawlai Circle, na u Bah W. L Narry, rangbah dong Pata bad kiwei kiwei.
