Shillong, Nohprah 15 : Ka Department of Sports & Youth Affairs, jong ka sorkar jylla ka la sdang ïa ka phase-II jong ka prokram wad khynnah donsap ha ki jingïalehkai bapher bapher ne ka State Talent Identification Program. Ka tnad ki kam ïalehkai ka la ïoh ban pyrshang ïa kumba shiphew hajar ngut ki heprit ha ka jylla, hadien ba ka la dep ïa ka Phase-I ha ka jingïatreilang ryngkat ka Meghalaya State Olympic Association (MSOA) bad ba la plie da ka Edge10 hapoh ka jingïalam u Ian Campbell u nongïalehkai Olympic pawnam ka pyrthei.
Ha u Naitung 2022 kumba 4541 ngut ki khynnah kiba ha ka rta ba 10 haduh 18 snem ki la ïoh ban pyni ïa ki sap ïalehkai bad kumba 200 ngut (100 ngut ki kynthei bad 100 ngut ki shynrang) la ïoh ban jied ban ai jinghikai pyntbit shuh shuh.
Ïa ka State Talent Indentification Phase-II la sdang ha ka 30 tarik Naiwieng 2022 ha H Elias Memorial School, Mawpat C&RD Block, ha ka 1 tarik bad 2 tarik Nohprah 2022 ha St Gabriel School, Upper Shillong, Mylliem C&RD Block, 3 tarik Nohprah 2022 ha Auxilium School Mawpat Block, 5 bad 6 tarik Nohprah ha Pynursla C&Rd Block,. 14 tarik ha Nokrek Heights School bad kaba la pynkut ha ka 15 tarik Nohprah ha Little Flower Schools, Dadengre C&RD Block.
Ïa katei ka prokram mynta la pynsangeh noh shwa namar ka shuti, Christmas bad New Year ïa kaba yn sa bteng biang ha ka taïew ba nyngkong jong u Rymphang 2023 ban pyndep ïa katei ka Phase-II ha Khasi, Jaintia bad Garo Hills.
