Shwa ka Elekshon 2023 pynïasoh BJP u Bah HM Shangpliang, ka Ferlin, u Benedict bad u Samuel

Shillong, Nohprah, 14: Saw ngut ki MLA ba la resaiñ dang shen kiba kynthup ïa u Bah Himalaya Muktan Shangpliang uba la phet na ka Trinamool Congress, u Bendict R. Marak bad ka Ferlin C. A. Sangma kiba la phet na ka National Peoples’ Party (NPP) bad u Associate Member jong ka United Democratic Party (UDP) u Samuel Sangma uba long Independent MLA ki la pynïasoh bad ka Bharatiya Janata Party (BJP) ha ka jingïalang kaba la long ha Headquarter jong ka party ha New Delhi ha ka sngi Balang.
Ïa kine saw ngut la pdiang burom sha ka BJP da ka jingsakhi lang jong u MP ka Rajya Sabha u Anil Baluni, u Convenor ka North East Democratic Alliance (NeDA) u Himanta Biswa Sarma uba long ruh u Myntri Rangbah ka Jylla Assam, u National Spokesperson uba peit ïa ka North East u Sambit Patra, u National Secretary jong ka BJP u Rituraj Sinha, u State President ka BJP u Bah Ernest Mawrie bad kiwei kiwei de ki nongïalam bahakhmat jong ka party.
U Rituraj Sinha haba kren sha ki lad pathai khubor, u la ong ba ka jingpynshai jong ka BJP halor ka phang, “‘Modi for Development, BJP for Meghalaya’ ka la ïaid shaid shaid ha Meghalaya bad ki paidbah ki la long kiba kloi ban kyrshan ïa ki jingangnud jong u Modi na ka bynta ban wanrah ïa ka jingkylla ha ka thaiñ Shatei Lammihngi ha ka roi ka par bad ka jingkiew shaphrang.
“Ka BJP ha Meghalaya kan sa nang ïohbor shuh shuh da ka jingpynïasoh jong kine ki saw ngut ki MLA,” u la bynrap.
U Sambit Patra haba pynpaw ka jingkmen halor ka jingpynïasoh jong kine ki saw ngut, u la ong ba ka Jylla Meghalaya kan sa sakhi ïa ki kam pynroi kumba long ha kiwei ki jylla jong ka thaiñ Shatei Lammihngi kiba la synshar da ka sorkar BJP.
U Himanta Biswa Sharma u la ong ba ki lai tylli ki jylla ha ka thaiñ Shatei Lammihngi kiba la synshar da ka Sorkar BJP ki la ïoh ban synshar ar sien kynthih bad kane kan dang ïai bteng ban pyni ba ki paidbah ha ka thaiñ ki la pdiang pura ïa ka BJP.
“Ban pyntyllun shakhmat ïa ka thong, ka BJP mynta ka la pynkhreh bha na ka bynta ka elekshon ha Tripura, ha Meghalaya bad ha Nagaland,” u la ong.
U la ong ba ka BJP ha Meghalaya kan sa nang kiew ha ka jingbun paid ban ïoh thaw ïa ka Sokrar na ka jingdon mynta tang arngut ki MLA ha kaba yn sa ïoh ban pyntyllun ïa ki thong treikam jong u Narendra Moti ha ka jylla.
U Bah H.M Shangpliang, haba kren ha ka jingïalang ha ka kyrteng jong ki lai ngut MLA u la ong ba ka BJP ka la kiew bha ha ka jylla Meghalaya.
“Ki paidbah ki kmen ban ïohi ïa ki kam pynroi jong ka BJP bad u Myntri Rangbahduh ka ri u Narendra Modi. Ka Meghalaya ka la donkam ïa ka jingkylla bad ka jingkylla kan sa urlong tang lyngba ki kti jong u Myntri Rangbahduh jong ngi,” u la bynrap.
Haba ïanujor ïa ka Jylla Meghalaya bad kiwei kiwei ki jylla ba la synshar da ka BJP ha ka thaiñ Shatei Lammihngi, u Bah Shangpliang u la ong ba ki paidbah mynta ki la ïohi tyngkheiñ kaei kaba ki la duh baroh shikatta.
“Ka sor Guwahati ka la kiew stet bha mynta, (katba ka Shillong bad ka Tura ki la shah ieh shadien). Ka Jylla Meghalaya ka donkam ïa ki surok kiba bha, ka pule puthi kaba bha, ka koit ka khiah kaba bha bad baroh ki kam pynroi bad kane kan sa urlong tang hapoh ka jingïalam jong u Narendra Modi,” u la ong. Shuh shuh u la ong ruh ba baroh saw ngut ki MLA ki long kiba kloi ban shakri ïa ki paidbah ha ka jylla hapoh ka shatri jong ka BJP.