Shillong, Nohprah 13: Ka Maitshaphrang Movement ha ka sngi ba-ar ka la tyrwa ba dei ban pynjanai bad kham pynïar ïa ka jingpyntrei ïa ka aiñ ïathoh shong kurim ne ka Meghalaya Compulsory Registration of Marriage Act 2012 khnang ban teh lakam ïa ka jingshah ieh khunrei ba khlem ai bai bam na u shynrang haba u phet lik ynda u la ïoh khun ïoh kti.
Ha ka kyrwoh sha ki lad pathai khubor u Convenor ka Maitshaphrang u Bah Michael N Syiem u la ong ba ha ka jingïalang kaba la long ha ka 13 Nohprah kaba la shong hapdeng ki dkhot ka movement bad ka Meghalaya State Comission for Women ki la rai ban phah da ka jingai jingmut sha ka sorkar ban khma pynïar ïa ka jingtrei kane ka aiñ ïathoh shong kurim khang ban teh lakam ïa ka jingshah ieh khunrei khlem ïoh bai bam na u kpa ki khun.
Ha kane ka jingïalang la rai ban tyrwa ba ka sorkar ka pynkylla ïa ka lam khmat jong kane ka aiñ ïathoh kaba kdew ba baroh u/ka briew ba la shong kurim u dei ban pyni ïa ka syrnot ïathoh ha haba ïadei bad kino kino ki kam ba dei bad ka sorkar.
U la ong ba dei ban pynïar ïa ka jingdonkam ka syrnot ïathoh kumba la leh ïa ka jingdonkam ïa ka Scheduled Tribe/Caste certificate ha baroh ki jingdonkam ba ïadei bad ka sorkar bad bynrap ruh ba dei ban ailad ïa ki BDO ha ki Block ba kin register ïa ka jingshong kurim ban pynsuk ïa kiba leit register jong ki.
