Ngam weng ïa ka jingkynnoh shiteng khlieh, haduh katno u ieit ïa ka Meghalaya : Dy. CM

Shillong, Nohprah 14 : U Symbud Myntri Rangbah ka jylla ub ah Prestone Tynsong u la sangah biang mynta ka Sngi Balang ïa u Saket Gokhale u nongaiktien ka AITC da kaba kylli haduh katno une u ieit bad u sngew shisha na ka bynta ka Meghalaya?
Haba kren bad ki nongthoh khubor u bah Prestone u la ong ba da lei lei ruh un ym weng ïa ki kyntien ba u kynnoh shiteng khlieh ïa u da kaba u ong “ Kaei kaba nga kren (Shiteng khlieh ne Psycho) ka ïeng skhem. Balei ngan pynlut por bad une u briew u bym don kam don jam bad ngim tip haduh katno u ieit ïa ka Meghalaya ruh”.
U la bteng shuh shuh da kaba ong “ Nga tharai phi tip bha u dei na kaei ka jylla hynrei u wan kren wat batai stad la kum ba u dei u nong Meghalaya”
U Symbud Myntri Rangbah u la ong ba um pat ju shem ne lap kat haduh mynta ba kat uta u nongai ktien ka party ne uta u National Spokesperson ka AITC un kren biej. “ Haba phi kynnoh phi donkam ban don ki sabut ki kot ki sla bad wat haduh ban da shondur ne ringdur ïa ki ruh, hynrei ban shu kren laplah da kaba kynnoh ba ka sorkar MDA ka dei ka sorkar nongtuh nga tharai ngam don por ban ïa pynlut por kam kai bad une u jait briew” ong u bah Prestone.
U la ong “ Ki jingkynnoh u Gokhale ki long kiba khlem nongrim khlem ki jingshisha namar ngi synshar da ki jingteh kyndon jongka sorkar bad ka aiñ la ka dei ha Meghalaya, kiwei kiwei ki jylla ne wat ha ka ri. La teh pyrkhing ïa ngi da ki kyndon ban synshar. kumta sa shisien nga ong ba ki jingkynnoh jong u ki long kiba khlem nongrim haei haei ruh”.
Dang ha 10 tarik mynta u bnai ka sorkar Meghalaya lyngba ka kompani jongka ka Meghalayan Age Limited kal la ujor mukotduma mynraiñ khmat pyrshah ïa une u nongai ktien ka AITC halor ki jingkynnoh ba khlem nongrim ha kaba ïadei bad ki jingpyntreikam ïa ki skhim jongka Meghalaya Ecotourism Infrastructure Development Project (MEIDP).
Ha ka Sngi Ba Ar une u briew u la kynnoh ba kane ka sorkar ka dei kaba tuh. Nalor kata u ong ba u kloi ban pdiang ïa kaei kaba u bah Pretone u kynnoh ia u u shiteng khlieh lada u bah Prestone pat u kloi ban ïatai nia bad u. “ Lada phi nud wan ban ïashong bad ïatai nia hynrei lada phi dei u nongtuh phin shu pynthohbria ïaka jylla. Ngan pynjah burom ïa phi namar phi pynjah burom ïa ka Meghalaya. phi ïatuh ia bam ïa ka pisa u paidbah” ong u Gokhale ha ka sngi ba ar.