Shillong, Nohprah 14 : U Symbud Myntri Rangbah ka Jylla, Bah Prestone Tynsong ha ka sngi Ba-ar u khyrwit tyngeh ïa u nongïalam ka Liang Pyrshah Dr. Mukul Sangma da kaba kynthoh kylla ba ha ka por ba u dang long kum u Myntri Rangbah ka jylla da ki spah sien u la pyneh ba ym donkam satia ban ai ïa ka Inner Line Permit. “Nga da lyngoh shisha, ujuh u briew uba ha ka por ba u long kum u Myntri Rangbah u da pyrshah tyngeh ban pyntreikam ïa ka ILP hynrei mynta pat u kylla ktien tang namar ba u la don noh ha ka Liang Pyrshah,” kynnoh kylla u Bah Prestone.
U ong ruh ba donkam ban tip kaei ka daw kaba u Dr. Mukul ha kito ki por um treh ban ai ïa ka ILP hynrei mynta pat u kwah ïa ka. “Ai ba ki paidbah nongshong shnong ka Meghalaya kin ïohsngew bad bishar ïa ka jinglong ba shisha jong u halor katei ka mat,” u la ong.
Da kaba pyntip ba ha kito ki snem ba long Myntri Rangbah u Dr. Mukul, ma u ruh u bat kum uwei na ki Myntri bad dei na kata ka daw ki tip ba la bunsien katei ka ILP ka shah kyntait haba ïa kren ha ka kynhun Myntri.
“Nga resain noh na ka Congress ruh dei na ka daw jong u, namar ngim ïohlad ban kren ei ei,” u ong.
Katei ka jingkren jong u Bah Prestone kadei hadien shisngi ba ka nongïalam jong ka TMC, ka Mamata Banerjee ka la pynbna ha ka jingwan ba arsngi jong ka sha Shillong ba lada ki paidbah ki jied ïa ka party ha ka bor, kan thung ïa ka komiti jong ki riewshemphang ban pule bniah halor ka ILP.
