Shillong, Nohprah 14: U Myntri ka tnat ka koit ka khiah u James Sangma mynta ka Sngi Balang u la ther tyngeh ïa u Saket Gokhale da kaba ong ban da u dei u briew ba shemphang u lah dei ban pynbiang shwa ïaki sakhi sabut halor ki jingkynnoh bamsap pyrshah ïaka sorkar synrop Meghalaya Democratic Alliance (MDA) hynrei une khlem ki jingshisha u la shu kynnoh ruma rutit tang ban pynthoh bria ïa kane ka sorkar.
Haba kren sha ki lad pathai khubor u James Sangma u la ong ba u National Spokesperson ka All India Trinamool Congress (AITC) Saket Gokhale udei u briew u bym sngewthuh ïaka rukom treikam ka sorkar bad dei namar kane u la shu kynthoh khlem nongrim ïaka sorkar jylla.
“Ngam kwah ban kren eiei pyrshah ïa u Saket Gokhale hynrei nga kwah ban ong ba ka sorkar ka bunkam naka bynta ka bha ka miat ki paidbah bad kam don por ban ïaheh nia kai bad u ne ban ïakren halor ka jingkynnoh bamsap ba khlem nongrim, khlem ki sakhi sabut” ong u James.
U James u la ong ruh ba Saket Gokhale u don ïaka hok ban kren ne ban kynthoh pyrshah ïaka sorkar hynrei lada u dei u briew u ba shemphang u dei ruh ban pynbiang shwa ïaki sakhi sabut kiba biang haba ïadei bad ka jingkynnoh bamsap.
U la ong ruh ba haba kut ki paidbah kin bishar la kine baroh ki jingkynnoh da u Saket Gokhale, kidei kiba don nongrim ne ki bym don nongrim.
