Da ka ïing aiti ka Dorbar Shnong Umkadhor sha i Mei ïeid Noris Rani, kum ka jingai sngewbha Khristmas

Nongpoh, Nohprah 14: Kum kawei na ki kam bad nuksa ba bha ban peit bad khmih khamtam ïa ki longïing ba donkam jingïarap, ka shnong Umkadhor mynta ka sngi kala aiti syndon da ka ïing ba paka sha iwei i Mei ïeid iba shem jynjar bad lanot, kum ka jingai sngewbha Khristmas ha katei ka shnong hadien ba im don ka jaka shong jaka sah kaba paka bad iba ju shong ju sah baroh shi katta ha kawei ka ïingtrep ba jot rathai kaba la isangsot ban peit bad jynjar wat tang ban sah ban dem.
ïa katei ka ïing la wan ban plie bad kyrkhu pynkyntang da u Fr. Michael Sun Parish Priest ka Umkadhor Parish, haka jingdonlang u Bah Andreas Tron Sordar ka Umkadhor, u Bah Center Doloi President FKJGP Western Zone, Bah Receive Pator President KSU Western Zone, Good morning Pator Sordar Nongdom bad kiwei kiwei ki riew rangbah bad ki longkmie na katei ka shnong.
Kum ban shu pynpaw ba itei i Mei ïeid Noris Rani ila don kumba 5 ngut ki khun bad hapdeng ka jinglong tymmen i hap ban shong ban sah marwei ha kawei ka ïing ba jot rathai kaba la isangsot wat ban peit, hynrei da ka jingshimkhia u Sordar Shnong lem bad ka Dorbar Shnong bad shibun ki nong noh synñiang kila lah ban pyndep ïa katei ka iing bad aiti syndon mynta ka sngi, ha kaba da ka jingkmen i Mei ieid Noris Rani i la pdiang sngewbha ïa katei ka iing bad i la ong ruh ba i la hun ka mynsiem wat tang ban ïoh tang ka ja suda ban bam hadien ba la ïoh ka ïing ba paka ban shong ban sah ryngkat ka jingkhublei ba kyrpang ïa ki nongïalam shnong bad baroh kiba dom bynta ban pynïoh ïa katei ka ïing.
Haba kren ha katei ka sngi naka liang u Bah Andreas Tron Sordar ka shnong Umkadhor u la ong ba kum u nongïalam shnong u dap da ka jingsngewkhia ban ïohi ba i Mei ïeid Noris Rani i don hapdeng ka jingjynjar kaba khraw ban shong ban sah namar im don ka ïing kaba paka, hynrei da ka jingshim khia jong ka Dorbar Shnong ryngkat ka jingnohsynñiang jong kiba bun ki riew kylluid mynsiem kila lah ban pynshna ïa katei ka ïing kaba paka ba yn shong yn sah bala lah ban aiti syndon mynta ka sngi.
Ki nongïalam ka FKJGP bad KSU ba kynthup ïa u Bah Center Doloi bad u Bah Receive Pator kila pynpaw ka jingsngewkmen kaba khraw halor ka jingshimkhia ka Dorbar Shnong ban leh ïaki kam isynei da ka jingkyrshanlang jong ki bala lah ban pyndep pura ïa katei ka ïing kaba la ïeng ha katei ka shnong ban aiti sha i Mei ïeid naka bynta ba yn shong yn sah, ryngkat ka jing duwai ba yn dang ïoh ka met ba shaid ba khlaiñ da ka jingkyrkhu u Blei.