Jowai, Nohprah 14: Ka jinglong jingman jong u Jowai Bypass na Thadlaskeiñ haduh Soomer katba dang mih ki sngi kala buh jingeh pynban ha ka leit wan jong ki paidbah na ka daw ka jingsniew bad ka jingbun palat ki thliew hapdeng surok.
Lyngba une u surok kiba bun na ki nongleit nongwan khamtam na ki jylla bapher bapher jong ka North East kiba la don da ki hajar tylli ki kali mator ha ka shisngi ki hap ïaid lynti lyngba jong une u surok By-Pass.
Namar ka jingsniew palat ynda poi ha kine ki bynta jong u surok Bypass ka la wanrah pynban ïa ka jingdheng kali da ki kynta namar ka jingsniew shaba palat jong ka surok bad don ruh ki kali kiba sahkut ha shiteng surok.
“Kumba long mynta une u surok By-Pass la donkam shisha ban maramot kloi ïa u naduh ka jingsiang rong bad ïa baroh ki bynta jong ka surok”.
Kum ban shu pynkynmaw ba ka ïing bishar ba donburom ka Meghalaya High Court ha ka 13 tarik mynta u bnai kala hukum ba ka sorkar jylla ka dei ban pynbha noh ïa ka jinglong jingman jong utei u surok Jowai By-Pass hapoh ka 3 tarik February, 2023, kane ka long katkum ka jingshong bishah ïa ka PIL ba la ujor da u Kynjaimon Amse uba dei na East Jaiñtia Hills District.
La pynsngew ba ïa ki kali kiba wan na Shillong ban leit sha Khliehriat ki hap ïaid lyngba une u surok By-Pass bad kumjuh ïa ki kali na ki thaiñ Silchar kiba leit sha Shillong ne Guwahati, hynrei ka jingsniew jong une u surok kala buh jingeh ïa ka leit ka wan jong kiba bun ba lang.
La ïathuh ba ïa une u surok Jowai Bypass u dang hap hapoh ka jingpeit jong ka Jowai PWD (R) Central) Division, na ka liang u MLA ka thaiñ u ma Wailadmiki Shylla ula pynbna ba la dep mang pisa haduh 12 klur ban pynbha pynmiat ïa utei u surok Jowai By-Pass.
