Nongpoh, Nohprah 14 : Ka long ka jingkyrkhu kaba khraw ïaki khun samla jong ka thaiñ Umsning khamtam ïaki samla jong ka shnong Lum-Umpih Umsning kiba ju sngewtynnad ban kilan met bad lehkai ha kaba hynin ka sngi na ka liang u Bah Jason S Mawlong MLA ka Umsning ula leit ban plie ïaka madan ïalehkai kaba la shna pynbha kyrpang ha katei ka shnong.
Ha kane ka sngi plie la sakhi ïaka jingtei ban pynbha ïaka madan ïalehkai naduh ka jingkynroh maw, ki nala bad ka jingker sainar haka jinglut kaba la kot sha ka 24.37 lakh kaba la pynmang na ka skhim State Sports Council jong ka sorkar jylla.
La sakhi ruh ha katei ka sngi da ka jingdonlang u BDO ka Umsning C&RD Block u Raja Brahma, u Benedick Syngkli Rangbah Shnong Lum-Umpih, ki dkhot jong ka Seng Samla Shnong bad ki longkmie bad ki longkpa.
Kum shibynta ban pynitynnad bad pynphuh pynphieng ïa katei ka sngi na ka liang ka Seng Samla Lum-Umpih ka la pynlong daka lympung ïalehkai phutball jong ki kynthei bad ki shynrang ha kaba la ioh ruh ban sam ïaki khusnam sha ki kynhun kiba jop.
