Hadien 50 snem tam la siang rong ïa ka surok ‘Jakrem-Ranikor Road’ ba ïaid na Rangmaw-Mawksiar, South West Khasi Hills District

Mawkyrwat, Nohprah, 14: U bah Renikton Lyngdoh Tongkhar u Nongmihkhmat jong ka Mawkyrwat Constituency bad u Myntri jong ka tnad umbam umdih ka sorkar Meghalaya mynta ka sngi u la ïoh ban plie ïa ka surok ba ki khot ka ‘Jakrem-Ranikor Road ban ïaid na Rangmaw sha Mawksiar’ kaba jngai kumba 10 km ha ka jingmang pisa kaba T. 7 klur tyngka kaba dei na ka skhim Central Roads Fund (CRF) jong u snem 2018.
Lah ban kdew ba kane ka ‘Jakrem-Ranikor Road via Rangmaw sha Mawksiar’ ka dei kawei na ki surok kaba la rim tam hapoh jong ka Jylla Meghalaya bad kaba la shna ha ki snem 1960 ei ei naduh ka por ba ka Meghalaya kam pat ïoh la ka jong ka Jylla hynrei ka dang hap ha ka Sorkar Assam. Ka ïoh ban siang rong ïa kane ka surok ka long ka jingmyntoi na ka bynta ka Shnong Mawkohphet, Dewlieh, Pyndenmawlieh, Mawksiar bad Phlang-kynshi.
U bah Renikton Lyngdoh Tongkhar haba kren ha ka jingïalang u la pynpaw ka jingaikhublei na ka bynta u myntri shnong jong ka Mawksiar uba la ïathuh shaphang ka khana lyngkot jong kane ka surok kaba dei ïaid na Jakrem-Rangmaw sha Phlangkynshi ha kaba ka dei kawei na ki surok Jakrem – Ranikor Road kaba la pyntrei naduh ki snem 1960’s ei ei. “Kane ka surok ka la kham heh karta ban ïa ka jylla Meghalaya namar ka Jylla ka dang dap 50 snem hynrei ka surok pat 58 snem ei ei bad ka dei ruh ka surok ka bym pat siang rong bad kaba la rim tam hapoh jong ka Jylla Meghalaya”, pynpaw u bah Renik.
Kumta u la ai ka jingïaroh ïa ka tnad PWD (Roads) bad ka sorkar Meghalaya lyngba u Myntri ka tnad PWD (Roads) kiba la trei shitom ban pynïoh jingmang pisa ym na ka Pradhan Mantri Gram Sadak Yojana (PMGSY) hynrei na ka Central Roads Fund (CRF) ha ka jingman pisa kaba T. 7 klur tyngka. Haba kren ha kaba ïa dei bad kane ka surok, u bah Renik u la ai ka jingïaroh ïa ki longshwa kiba da ka jingstad jong ki ban pynkohnguh ïa ka ban pyntrei ha ka por jong ka sorkar Assam da kaba ai kyrteng ïa ka ka Jakrem – Ranikor Road hynrei ynda la poi ha kane ka shnong pat ki la ïohi sa tang ïa u lyoh namar ba ym lah ban pynpoi ïa ka surok haduh Ranikor na ka daw jong ka jingdon jong ka lyhuh bah. “Kane ka pateng ba mynta, kin kheiñ kor ïa kane ka jingprad lynti ki longshwa bad ngin pyrshah ban pynurlong ïa ka jingphohsniew jong ki da kaba pynpoi ïa ka thong jong kane ka surok haduh Ranikor”, u la ong.
U bah Renikton u la ong ruh ba ym tang ki lad pynroi lyngba ki surok ba ki paidbah ki ïoh hynrei wat ha ka liang ka umbam umdih ruh ki la ïoh lyngba ka JJM ha kaba kane ka shnong ka la long kawei kaba la ïoh bynta. Haba kaba ïa dei bad ka roi ka par jong u paidbah, u bah Renikton u la ong ba un sa thaw ki lad ki lynti khnang ban ïoh ban leh bad pyndep ha ka por kaba biang namar ka long kaba dei ba ki paidbah kin ïoh ïa kita. U la pyntip ruh ba ha kine ki khyndiat sngi ynsa pyndep ïa kiba bun ki bynta kiba ïa dei bad ki kam pynroi jong ki paidbah ha kaba kawei ka dei ban buh ïa ki maw nongrim jong ki katto katne ki surok ha 20 tarik u Nohprah, 2022 bad kawei pat ka dei ka jingplie ïa ka jaka sumar ba 100 jingthiah ha Mawkyrwat CHC kata ha ka 22 tarik u Nohprah, 2022 namar kane ka dei ka jingangnud kaba la slem bah jong ki paidbah ka South West Khasi Hills District baroh kawei.
Namarkata, u la buh ka jingkyrpad na ka bynta ki paidbah jong ka dong ka thaiñ ba kin ïai long kiba ïatreilang ha ki liang baroh khnang ba ki kam kiba bun ban pyndep kin long kiba seisoh bad kiba urlong bad ba ki paidbah ruh kin ïoh ki jingmyntoi.
Ka kong C. Kharkongngor, IAS, Deputy Commissioner, South West Khasi Hills District, kum ka symbud kongsan ha ka jingkren jong ka ka la pynpaw ba da ka jingdon jong ka surok ka long ka jingïarap ha kiba bun ki bynta la ka long ha ka roi ka par, ka koit ka khiah bad ka pule dang le ruh namar da la don ki surok kiba bha ki briew kin kham suk ha ka leit ka wan lyngba ki kali.
Kiba ïadonlang ha kane ka sngi ki long naduh u Executive Engineer ka PWD (Roads), u bah D.M. Pyngrope uba long u nongpynïaid ïa ka jingïalang, u Myntri Shnong jong ka Mawksiar, u bah Brialterius Nongbsaw, ka jingkren pdiang na u bah S.I. Laso, Assistant Executive Engineer ka PWD (Roads) Mawkyrwat Division bad ka jingkren khublei na u bah Banjoplang Shylla, Assistant Engineer jong ka PWD (Roads) Mawkyrwat Division. Ha kane ka sngi la sakhi lang naduh ki Rangbah Shnong, ki riew rangbah, ki longkmie, ki samla bad ki hep kiba rit.