Nongstoiñ, Nohprah, 13: “Ka por ka dawa ba baroh ki shipai kiba la ïashim bynta ha ka jingïaleh ban ïoh ïa ka jylla da kaba shah set phatok ha Shillong bad ha Guwahati, kata kiba kynthup naduh West Khasi, East Khasi, Ribhoi bad Jaiñtia Hills, kin ïa tylli lang kawei bad kin mih madan ban dawa pynurlong Khasi bad Jaiñtia State”, ong u paieit E.Lyngkhoi phra phew wei snem ka karta haba ïakren bad u nongthoh khubor ha Nongstoiñ.
U la ong ba watla kiba bun ki riew ialeh ki la khlad noh ruh, hynrei katkum ka jingtip jong u kiba dang im haduh mynta ki dang don palat spah ngut. Ha kajuh ka por u la ong ba ma u kum u nongïalam ïa ka group kaba nyngkong ha ka karta kaba 81 snem, u kwah dik dik ba baroh ki shipai kiba la ïashimbynta ha ka jingïaleh hill state na baroh ki District hapoh ka jylla, kin ïatylli lang kawei bad kin thaw da ka kynhun kaba kyrpang ban dawa na ka sorkar India ba kan phiah noh ïa ka Khasi Jaiñtia bad ka Garo la ka jong.
U la ong ba kane ka dei ruh ka thong kaba hakhmat eh kaba u (L) Maieit Hopingstone Lyngdoh u ba la ïeng pyrshah ban pdiang ïa ka sub state bad u ba la shah beh noh ha ki nongïalam ka APHLC kiba pdiang ïa ka sub state, ha kaba u la seng ïa a HSPDP bad lyngba ka jingïalam jong u ban pdiang burom ïa ka (L) Smt Indira Gandhi da ki lama ïong ha ka por ba ka wan sha Shillong ba la ïoh ïa ka jylla ba pura.
Ha kajuh ka por u la ong ba kawei ka thong kaba hakhmat eh kaba u (L) Maieit Hopingstone Lyngdoh u la ieh shadien ha kane ka pateng kaba mynta ka long ban dawa ïa ka Khasi Jaiñtia State. Dei halor katei ka nongrim ba u la ong ba lada baroh ki shipai kiba la shah kem bad shah set phatok kum kita ki political prisoner, kin ïa tylli bad kin mih madan ban dawa Khasi Jaiñtia State bad ki Garo kin dawa la ka jong ka jingdawa Garo State ha ryngkat ka jingkyrshan jong ki paidbah, ym don jingartatien ei ei ba ka sorkar India ka hap ban shimkhia ïa katei ka mat.
