Yn wan ki heh ka ECI sha Shillong ban bishar ïa ka jingpynkhreh ïa ka election MLA 2023

Shillong, Nohprah 12 : Ki heh ka Election Commission of India (ECI) kin wan sha kane ka nongbah mynta ka taiew ban bishar ïa ka jingpynkhreh jongka tnad election jongka jylla ïa ka election MLA ka ban long ha u 2023.
“Kine ki heh ka ECI kin wan ban don jingïalang bad ki tnad sorkar bapher bapher jongka sorkar jylla bad sorkar pdeng” ïathuh u bah F.R Kharkongor Chief Electoral Officer (CEO) ka jylla. Kine ki heh ka ECI kin don ki jngïakren bad ïaphylliew jingmut bad ki heh na ka tnad pulit, Income Tax, Excise bad ki heh ka tnad Election.
Ka jingwan jongki ka long ban bishar bniah kumno ka jingpynkhreh ïaka election MLA ha ka jylla ka la sdang ban ïaid shakhmat. Nalor kata kin bishar ruh ïa ka shongsuk shongsaiñ khamtam hadien ba u Chief Electoral Officer jongka jylla ula pan 119 pyrton ki bor pahara jongka sorkar pdeng ban wan ïarap ha ka election MLA 2023.
“ Kane ka kynhun kaba wan nyngkong mynta ka dei ka kynhun ban bishar ïa ki jingkheiñ jingdiah ( expenditure) bad kin ïakynduh ïaki tnad ka sorkar pdeng bad sorkar jylla” ong u bah Kharkongor.
“ Ngi la pan haduh 119 pyrton ki bor pahara na ka sorkar pdeng namar ki don haduh 782 tylli ki polling station kiba don jingma bha bad 402 lei lei kiba ju jia bha ki jingjia ha ki por election. Nalor kata ki lah ban dang bun shuh shuh namar kan don beit ka jingkylla katba nang jan sha ki sngi” ong biang u bah Kharkongor.
La ïathuh ba ka jingpynrung kyrteng ïa ki nongthep vote kiba dang ïoh thep vote ha ka sien ba nyngkong eh ruh ka la ïaid shakhmat ha baroh ki district. Ka jylla ka don haduh 21.11 lak ngut ki nongthep vote kat haduh u bnai ba la dep bad na kine 10.68 lak ngut ki dei ki kynthei.