Shillong, Nohprah 12 : Ka lympung ïalehkai kriket U-13 Boys T20 Challengers Trophy 2022 ba la pynïaid da ka East Khasi Hills Cricket Association (EKHCA) ka la sdang hynne ka sngi Nyngkong, ha kaba ki heprit ki la ïashim bynta bad pyni ïa la ki sap ïalehkai ki jong ki ha Marbisu.
Ka jingïalehkai kaba nyngkong ka la long hapdeng ka Symper Rangers pyrshah ïa ka Laitlum Hitters, ha kaba ka kynhun jong ka Laitlum Hitters ka la ïoh khur ïa ka jingjop.
Ha ka jingïalehkai, ka Symper Rangers kaba jop ïa ka jingkynting pisa ka jied ban kawang bol nyngkong ha kaba ka Laitlum Hitters kaba tied nyngkong ka la ïoh ban kamai 99 ron hap noh 5 wicket ha baroh ki 20 over.
U Everbloom Nongrum u kamai 22 (31) bad u Menang Shangpliang u kamai 16 (41) katba u Pynshngaiñ Sohkhlet u ïoh 1 wicket ai kamai 12 ron ha ki 4 over.
Haba beh ïa katei ka thong, ka Symper Rangers kam lah ban kamai ron ha kaba ka la shah pynhap lut baroh ki wicket da kaba kamai tang 46 ron ha ki 9 over. U Dame Wanbiang Shadap u kamai 21 ron (13) bad u Mekhraw Pyrkhat u ïoh khur 3 wicket marwei bad ai kamai 11 ron tang ha ka 1 over ba u ïoh ban kawang bol. Kumta ka Laitlum Hitters ka la pynliem da 53 ron.
Ka jingïalehkai ba arsien ka long hapdeng ka Mawlynnong Fighters pyrshah ïa ka Symper Rangers bad ka Symper Rangers ka la jop da 55 ron. Ha kane ka jingïalehkai kaba ar ka long kumjuh kum ha ka jingïalehkai kaba nyngkong ha kaba ka Mawlynnong kaba la jop ïa ka jingkynting pisa ka la ailad shwa ïa ka Symper Rangers ban tied nyngkong.
Katei ka kynhun kaba la ïoh ka kabu ban tied nyngkong ka la kamai haduh 137 ron duh noh 8 wicket ha baroh ki 20 over. U Dame Wanbiang Shadap u rangtied ba kamai bun ron tam da 70 ron na ki 26 bol katba u Damian Kupar Shylla u ïoh 2 wicket ai kamai 9 ron ha ki 4 over na bynta ka Mawlynnong.
Haba wan beh ïa katei ka thong, ka Mawlynnong Fighters kam lah ban tied ïa ki bol ba la kawang da ka Symper ha kaba ka la kamai tang 83 ron bad shah pynhap lut baroh ki wicket ha ka 12.1 Over. Dei tang u Hamebandap War uba kamai bun ron na bynta katei ka kynhun uba la kamai 43 ron na ki 28 bol. U Othaniel Lyngdoh Nonglait marwei u khur haduh 4 wicket ai kamai 10 ron ha ki 3.1 over, ha kaba ka Symper Fighters ka la pynliem da 55 ron.
