Ka ishu jong ka NPP ban jop elekshon ha u snem 2018 dei u dewïong: MLA Nongpoh

Nongstoiñ, Nohprah 8: Kum shi bynta jong ka jingpynkhreh ïa ka election ka ban long ha u snem ban wan, u Dr.Mul Sangma Myntri Rangbah barim ka jylla u ba long ruh u nongïalam jong ka liang pyrshah ha ka Ïingdorbar Thaw Aiñ ka jylla, mynta ka sngi palei ka 8 tarik Nohprah u la hiar sha Nongstoiñ ban plie ïa ka ophis treikam jong ka Nongstoiñ Block Trinamool Congress kaba don ha Nondeiñ.
Ha kane ka sngi la synran lang ïa u Dr.Mukul Sangma da u bah Charles Pyngrope State President All India Trinamool Congress Meghalaya, u bah George B Lyngdoh MLA ka Umroi constituency, u bah James Lyngdoh Vice president ka AITC Meghalaya, u bah Macmillan Kharbani President ka Nongstoiñ Block Trinammol Congress u ban sa ïakhun ha kane ka election ban wan, u bah Justin G Momin president ka Mawshynrut Block Trinamool Congress u ba dei ruh u kyrtong u ban ïakhun ha ka election ban wan, bah Fernandes Dkhar kyrtong ka Trinamool Congress na ka Rambrai Jyrngam, ki riew rangbah bad ki paitbah kiba la wan na ki kylleng jong ka Nongstoiñ Constituency.
U bah Macmillan Kharbani haba kren ha ka jingïalang, u la pynkynmaw ba ha u snem 2010 ma u ryngkat bad ki paralok ki la leit ban ïakynduh ïa u Dr.Mukul Sangma, na ka bynta ba un ïarap ban pynbha ïa ka surok bad lyngba ka jingtrei shitom jong u la lah ban pynïoh ïa ka surok National Highway na Shillong sha Tura kaba la pynsuk ïa ki paitbah ha ka leit ka wan.
U la ong ba kiba bun ki paitbah ki ju ong balei ba ka TMC ka wan ban buh kyrtong ha Nongstoiñ, hynrei katei ka jingong jong ki ka dei namar ba kim pat tip ïa ki nongrim treikam jong ka TMC. U la pynshai ba ka TMC kadei ka party kaba ïeng na ka bynta u ba duk bad u paitbah ba im jynjar.
Ym dei tang katta hynrei ka TMC ka don ïa ka thong ban ïaleh pyrshah ïa ka jingsynshar donbor ha ka jylla, kaba la sdang naduh u snem 2018, kat haduh ba katba nang mih ki sngi ki paitbah ki nang jynjar bad sohsat, namar kat shaba phai la ka long ha ka kamai kajih, ka khaïi ka pateng ka thungkam thungjam bad kiwei kiwei la bat bor tang da kita ki high level. Dei halor katei ka nongrim ba ka TMC ka hap ban ïeng pyrshah ban pynduh syndon ïa katei ka jingsynshar.
U bah George B Lyngdoh MLA ka Umroi, haba ai jingkren u la ther tyngeh ïa ka sorkar bad u Myntri Rangbah halor ka jingpynsepei ïa ka skhim umbam umdih, namar ba ha ki shnong ki don tang ki kor hynrei ka um pat kam poi. U la ther tyngeh ruh halor ka jingsam sniang jong u Myntri Rangbah namar ba bun ki sniang ki shu ïap ei. U la ther ba ka ishu ne jingkular ka NPP ka long ban plie suk khlem jingwit u dewiong, hynrei haduh mynta hato la plie bad kamai laitluid u dewiong ï. Ha Nongstoiñ lei lei ishu thymmai ka NPP ka long sa ka ishu land bill.
U Dr.Mukul Sangma, u la ong ba ha ki snem ba mynshuwa bun ki nongshong shnong ka West Khasi Hills, ki mad jingeh haduh katta katta bad ha ka por ba u long kum u Myntri Rangbah, u la shimkhia kumno ban pynïoh ïa ki surok bad dei ha ka por jong u, ba ka sorkar ka la mang pisa na ka bynta ban shna ïa ka National Highway na Shillong sha Tura, ka surok na Nongstoiñ Rambrai haduh Kyrshai, Nongstoiñ-Wahkaji, Riangdo Athiabari bad bun kiwei kiwei pat ki surok kiba la dep trei bad ki bym pat dep.
U la pynkynmaw ruh ba ka National Highway Shillong-Tura kadei ka surok kaba kongsan kaba la pynsuk shisha ïa ka leit ka wan jong ki paitbah. Nalor kata u la ther tyngeh ïa ka sorkar MDA halor ka jingleh bym suidñiew ïa ki nonghikai kat haduh ba ki hap ban mih sha surok ban ïakhih pyrshah ïa ka sorkar.
U la pynkynmaw ruh ba ha ki snem ba mynshuwa ha ka por ba u (L) bah Hopingstone Lyngdoh u dang long u MLA, ki paitbah ka Nongstoiñ ki im suk im saiñ namar u dei u nongïalam u ba stad, u ba shlur bad u ba trei hok ïa ka kam na ka bynta ki paitbah, hynrei naduh u snem 2018 ki paitbah jong ka Nongstoiñ bad ka jylla baroh kawei ki mad tang ki jingeh suda.
U la ong ruh ba ka dei ka sien ba nyngkong ba kum u myntri Rangbah barim ka jylla, kat shaba u leit u ïoh sngew beit tang ïa ka jingïakren shaphang kita ki high level bad ka la pynlyngngoh ïa u namar um ju ïohsngew baroh shi katta. U la kyntu ïa ki paitbah ba kin long kiba stad bad kiba sian ban jied ïa ki nongmikhmat ha u 2023, namar lada ki bakla kin sa babe kham palat ban kaei kaba ki la dep babe mynta.