Shillong: Ka Khasi Students’ Union (KSU) Wahkaliar Unit, ka la ïoh ban leit ai da ka jingthoh ha u Executive Engineer jong ka tnat PWD (Roads), Sohra Division ban ujor halor ka jingjot rathai jong ka surok baroh shilynter naduh Wahshari-Khliehshnong, Sohra shaduh ka shnong Laitduh, Sohra kaba jngai kumba 7 Kms.
Ha ka dorkhas, ka seng ka la dawa na ka tnat PWD (Roads) ba ka dei ban maramot ne pynbha noh mardor ïa kane ka surok khnang ban pynsuk ïa ka leit ka wan jong ki paidbah kiba ju pyndonkam ïa kane ka surok.
Kum ban shu bynrap khyndiat, ïa kane ka surok na Wahshari-Khlieh-shnong, Sohra shaduh ka shnong Laitduh ym shym la maramot ne pynbha mynta la bun bun snem bad kumba long mynta, kane ka surok ka la jot bad sniew haduh katta katta bad kam i ïadei dur shuh ban ong ba ka dei ka surok ïaid kali bad na kane ka jinglong jingman jong kane ka surok ka la buh jingeh shikatdei ïa ki paidbah kiba leit ba wan lyngba kane ka surok bad khamtam eh ïa ki khynnah skul bad kumjuh ruh ïa kiba pang ba shitom. Kane ka surok kadei ruh kawei na ki surok kaba ïalam sha ki katto katne ki jaka jngohkai ba pawnam ha ka thaiñ Sohra, kum ka Kshaid Daiñthlen, Wei Sawdong bad kiwei kiwei. Na ka daw jong ka jingsniew palat jong ka surok ka pynlong ruh ïa ki nongjngohkai pyrthei ba na kylleng ki jaka ba kin ym leit shuh sha kitei ki jaka ba itynnad bad kane ka la pynhiar shikatdei eh ïa ka ïoh ka kot bad ka kamai kajih jong ki briew kiba ju imja kpoh na ka kam jngohkai pyrthei ha kane ka thaiñ.
Ka PWD (Roads) Sohra Division, ka la ai ïa ka jubab ha kaba ïadei bad ka shithi kaba la phah na ka liang jong ka seng bad ha kane ka jubab na ka liang jong ka PWD (Roads) Sohra Division, ka la ong ba ïa ka jingpynbha bad maramot ïa kane ka surok yn sa pynrung lyngba ka skhim PMGSY. Ka Seng ka kyntu jur ïa ka tnat PWD (Roads) jong ka sorkar jylla ba kan shimkhia khamkloi ban maramot pynbha noh ïa kane ka surok khnang ba kan pynsuk ïa ki nongkeit nongwan kiba ju pyndonkam ïa kane ka surok manla ka sngi.
