Shillong, Nohprah, 07: U National Vice President ka NPP uba long ruh u Symbud Myntri Rangbah u bah Prestone Tynsong u la ong ba ka NPP ka long kaba la pynkhreh bha ban leit sha ka election MLA 2023 bad ka kyrmen skhem ba kan ïoh ban synshar marwei ha u 2023 ha Meghalaya namar kan jop beit palat ïa ka 32 constituency.
“Ngi la long kiba la pynkhreh bad long kiba la kloi ban ïakhun ïa ka election. Hadien ka election 2023 ngin sa thaw ïa ka sorkar tang ka NPP” ong u bah Prestone.
Halor ki jingkylli ula ong ka election ha Meghalaya ka pher bha kumta ym ïohi ba kiwei ki party kin long ka jingma ïa ka NPP bad ka NPP kan long ka jingma ïakiwei namar hangne hi ki paidbah ki phai ruh sha u kyrtong uba ki tip ba u lah ban ai ka jingshakri hok ïa ki.
“Nga la ju kren na ka por sha ka por ba ka election ha kanek a jylla ka pher bha namar haba ki paidbah ki rai ban jied ki jied ïa u kyrtong uba ki ieit bad ithuh, uba lah ban shakri, uba don ka jingïadei bad ki bad khamtam eh uba ki sngewjan. Kumta hangne hi ka party ka wan kham hadien namar haba ki paidbah ki rai ban jied ia u kyrtong ki jied ïa u ne ka briew ba ki ieit bad shaniah,” pynkut u bah Prestone.
