La khlaiñ kiba shah siat, shen yn mih na NEIGRIHMS

Shillong, Nohprah 07 : Ki arngut ki rangbah ba shah siat ha ki pulit Assam ha ka 22tarik Naiwieng ha Mukroh, ki la kham ïohbor mynta ha ka jingsumar ha NEIGRIHMS Hospital bad katkum ka jingïathuh ki doktor shen kin sa ïoh ban leit phai iing noh.
Ïa kane la pyntip da ki bor pynïaid jong ka NEIGRIHMS ha u Myntri ka sorkar jylla, Bah Sanbor Shullai uba la leit jngoh ïa kitei ki arngut ki rangbah ba tip kum u Bah E Samaiang bad Bah C Nartiang.
“La pyntip ïanga ba uwei na ki, un sa ïoh ban leit phai iing noh katba uwei pat un dang hap ban shah sumar shwa,”ong u Bah Sanbor haba kren bad ki lad pathai khubor.
Haba pyntip ba hadien ba u la ïoh jingtip ba kitei ki rangbah ki dei na ka longiing ba duk nalor ba ki ngat sa ha katei ka apot, kumta um lah ban shu sngap kumto hynrei ban leit noh jingïarap lang katto katne na bynta jong ki.
Watla na ka liang ka sorkar ka la rai ban siew lut ïa ka bai sumar na ka bynta jong ki, hynrei na ka liang u Bah Sanbor pat u la ong ba kitei ki arngut ruh ki dei hok ban ïoh ia ka jingkyrshan pisa na ka sorkar.
“Lashai ngan sa kren bad u Myntri Rangbah ba kine ki arngut ruh ki dei ban ïoh lang ïa ka jingkyrshan pisa na ka sorkar nalor ba kidei na ki longiing ba duk,” u la ong.
Ha kane ka jingleit la synran ia u Myntri da ki nongïalam ka BJP kynthup ïa u Bah Wallam Khongwir bad Bah Tobias Marak, ki nongpynïaid ka hospital bad u Medical Superintendent ka NEIGRIHMS, u Dr. C Daniella uba la batai ïa ka jinglong ka koit ka khiah jong kitei ki ar ngut.