Khlem jubab shai u Bah Metbah la ka UDP kan tohkit ne em ïa ka bamsap lada wan ha ka bor

Shillong, Nohprah, 07: U President ka UDP u Bah Metbah Lyngdoh um shym la kren shai satia lada dei ba ka UDP kan wan ha ka bor hadien ka elekshon ha u 2023 kan pynlong jingtohkit ne em halor ki jingkynnoh ba ki jyllei ki jyrsieh bamsap ha kane ka sorkar ba mynta khnang ban lap ïa ki jingshisha baroh.
Haba ki nongthoh khubor ki la kylli lada dei ba ka UDP ka wan ha ka bor kan pynlong jingtohkit ne em halor ki jingshah kynnoh bamsap kiba jur bha jong ka sorkar MDA ha kaba ïadei bad ki jingpyntrei ïa kiba bun bah ki skhim, u Bah Metbah um shym la jubab shai la kan leh ne em kumta ka UDP hynrei u la shu pynphai ktien, “Kaei kaba mih ha ki kot khubor kam dei kaba shisha baroh khoit bad ngam kwah ruh ban ong eiei namar ngam ju shu ngeit lymmuh kat kaba ki thoh kat haduh ba ngan da wad ïa ka jingshisha,” u la ong.
Haba kylli biang la u idei ne em ban tohkit halor ki kam bamsap, “Naduh kaba sdang hi ngi ju dawa ban don ka jingtohkit haba don kino kino ki khep kiba ngi ïohi ba ki don ki jingkynnoh bamsap kiba i shongnia,” u la pynphai ktien.