Ban shngaiñ ki nongleit jingleit, aiti ha ka BSNL ban pyntreikam ïa ka AIS:40, dawa ka FKJGP

Shillong, Nohprah 07 : Ka FKJGJP ha ka sngi Balang ka la kyntu ïa ka sorkar jylla ba thung da ka BSNL na ka bynta ban pyntreikam noh ïa ka AIS : 140 vehicle tracking project ha Meghalaya.
Haba kren bad ki lad pathai khubor hadien ka jingkynduh ïa u Symbud Myntri Rangbah ka jylla, Bah Prestone Tynsong na ka liang u President ka seng Bah Dundee C Khongsit u la ong, “Ngi la ai jingmut ban thung da ka BSNL lyngba ka jaka treikam jong ka, kaba don ha Shillong ban pyntreikam ïa ka AIS:140 project jong ka jylla.
Shuh shuh u ong ba ka seng ka la ïoh jingtip ba ka sorkar India ka la bthah ïa ka sorkar jylla ban don noh la ka jong ka jingtreikam haman ki jylla bad mang pisa ruh lyngba ka Nirbhaya na ka bynta ban pyntreikam ïa katei. U la ong ruh ba ka sorkar Meghalaya ka la ïoh ïa ka mang pisa kaba 10.4 klur na bynta ban don ïa ka state command control system kaba dei na ka bynta ban pyntyllun ïa ka kam na bynta ar snem.
U ong ruh ba kane ka projek ruh kadei kaba donkam bha namar kadei na bynta ka jingshngaiñ jong ki paidbah kiba leit ba wan ha ka jylla namar kadei beit da ka thong ban ai jingshngaiñ khamtam eh ïa ki kynthei ha kaba kan ïarap ban ïoh kem ïa ki runar bad ki nongpynkheiñ aiñ.
Shuh shuh u la ong ruh ba lada don ki jingjia tyngkhuh kali lane ki jingshah thombor ïa ki nongshong kali khamtam ki kynthei, u budam jingma ba la buh un ai jingtip sha ka police station kaba don hajan eh bad ruh ïa ki tnad ba dei peit ïa ka aiñ ban ai ïa ki jingïarap ba kyrkieh.
“Kane ka projek kan ai jingtip lut sha ki pulit ha kano ka jaka don ka jingjia bad ruh ka transport department bad Tnad Kampohiing kan lah ban ïakhun ban pynduna ïa ki kam pyntriem ha ka jylla,” u la ong.
Katkum ka jingong jong u, kane hi kan dei kawei na ki lad ïohkam ïohjam na bynta ki samla ka jylla.
Ha kajuh ka sngi, ka Seng ka la dawa ruh na u Symbud Myntri Rangbah ban don noh da ki karkhana shna jingbam ïa ki jingri ha ki jaka kiba long pdeng ha ka jylla.
Katkum ka jingong jong u, kumba 80 persen na ki jingdonkam ban pynheh ïa ka kam ri sniang ri syiar la hap ban wanrah beit na shabar jylla kum naduh Haryana, Punjab, Uttar Pradesh bad na kiwei ki jylla.