Tura, Nohprah, 07: Ka tnad ka koit ka khiah lyngba ka Meghalaya Health Systems Strengthening
Project (MHSSP) da ka jingïatrei lang bad ka TechEagle ka la plie ïa ka jaka pynher drone kaba nyngkong eh ban leit sam dawai sha ki paidbah ha Jengjal Sub-Divsional Hospital.
Ïa utei u dron kit dawai la pyllait paidbah da u Myntri ka tnad, James K Sangma ha kaba utei u drone ba rah dawai u la kiew suin ha ka sien kaba nyngkong eh na Jengjal Sub-Division ha ryngkat ka jingsakhi lang ki heh na ka World Bank, ki doktor bad ki heh na ka tnad ka Koit ka Khiah bad kiwei kiwei.
Ha katei ka sngi, utei u drone un leit ban pynhap dawai sha ka jaka kaba jngai kumba 36kilometer kata ha Pedaldoba kaba la shimpor kumba 30 minit ei ei.
Ki dawai ban ai jingïada ïa ka jingim kum ki dawai shah dait miaw dait ksew (anti – Rabies) bad shah puh bseiñ la lah ban pynurlong da utei u drone, kaba la pynlong ïa ka rilum ban sakhi ïa ka sngi kaba kyrpang tam ha ka liang ka tnad ka Koit ka Khiah khamtam haba u lah pat ban wanphai biang ha ka por mynmiet sha ka jaka dem kaba don ha Jengjal.
“Kane jingpyndonkam ïa u drone kadei ka jingsdang jong ka jingkylla ha ka liang ka koit ka khiah,” ong u Myntri ka Koit ka Khiah ha katei ka sngi.
U Myntri u la ïathuh ruh ba ha shwa kane, ka ju shim kumba lai kynta ne palat da ïaid da ka kali ban leit buh dawai hynrei da u drone pat ka shimpor tang kumba 30 minit. “Ngi buh ka thong ban pynstet shuh shuh ïa ka jingpynpoi ïa ki tiar ai jingsumar ïa kaba ngi kyrmen ba ngin lah ban leh da ka jingïarap jong ka World Bank,” u la ong.
