Shillong, Nohprah, 07: Ka tnat Elaka jong ka Khasi Hills Autonomous District Council (KHADC) ka la phah jingtip sha ka Ophis jong ka Hima Mylliem ban pyntip ba ka la pdiang ïa ka shithi iehnohkam jong u Pa’iem Latho M. Syiem uba la shah sospon halor ki jingshah ujor.
U Executive Member ka tnat Elaka jong ka KHADC u Bah Jambor War ha ka jingïakren bad u Mawphor lyngba ka telephone u la ïathuh ba ka District Council ka ladep phah ïa ka jingpyntip (Notification) sha ka Ophis jong ka Hima Mylliem hadien ba u Pa’iem Latho M. Syiem u la phah ïa ka shithi iehnoh kam naduh ka 10 tarik, Naiwieng, 2022 bad aidaw ba u la don ha ka rta kaba la noh, nangta ba um shym don shuh ha ka met kaba Koit ka Khiah.
Dang ha ka Lah Sngi U Blei u Bah Jambor War ha ka jingïakren bad ki lad pathai khubor ong ba ka daw kaba kongsan ba ka Executive Committee lyngba ka tnat Elaka ka la shim ïa ka rai ban pynlong noh ïa ka elekshon ka long hadien ba ka tnat Elaka ka la pdiang ïa ka shithi iehnohkam jong u Pa’iem Latho.
Ka Ingbishar Meghalaya High Court ha ka hukum ba la pynmih ha u Risaw, ka la bthah ïa ka KHADC ban pyndep ïa kane ka kam hapoh 3 bnai.
