Da ka rai kaba biang kawang ka Meghalaya High Court ïa ka Sorkar MDA

Ka Meghalaya High Court ba donburom ka la ai syndon da ka rai kaba biang ha ka por ba ih bha ban pynduh pyndam noh pyrshah ïa ka rai leh donbor bad bym shongnia ne shong nongrim jong ka Sorkar MDA halor ka jingïashim bynta ki nonghikai bym dei Sorkar (Govt.Aided Proffessors/Lecturers/Teachers) ha ki kam paidbah.
Kane ka rai jong ka Kashari ba heh duh jong ka jylla Meghalaya ym tang ba ka pynkhie im bad ai mynsiem biang ïa ki nonghikai bym dei Sorkar hynrei ka dei ruh ka rai kaba la pynim biang ïa ka hok bad ka jingang nud ban shakri ne trei jong ki nonghikai ban ai lem ki jinghikai, ki jingpynsngewthuh paidbah ha ka kam saiñ hima-sima baroh.
Shwa ban mih kane, ka Sorkar MDA ba la lamkhmat da ka party NPP, baroh ki nonghikai bym dei Sorkar (Govt.Aided Colleges/Schools) ki lah ban shim bynta laitluid ha ki kam politik katba ki mon ha ki party bapher bapher. Naduh ka por ba long Chief Minister u (L) Capt.William A. Sangma, u (L) Darwin D. Pugh, u (L) Brington Buhai Lyngdoh, u (L) Purno Agitok Sangma, u Salseng C Marak, u (L) Dr.Flinder Anderson Khonglam, u Dr.DD Lapang, (L) J.D Rymbai, (L)Dr.Donkupar Roy, u Dr.Mukul Sangma bad kiwei kiwei kim ju pynwit lane pynthut satia ïa ki nonghikai ba kin ïadon bynta ha ki kam saiñpyrthei. Mar ïa shimti kane ka Sorkar MDA ha u snem 2018 hapoh ka jingïalam jong u Conrad K. Sangma jong ka NPP, la sdang ban bishni bad pihuiñ da kaba teh ba khum da ki kyndon ba eh pyrshah ïa ki nonghikai bym dei Sorkar. Ym tang ba ki shun thlong mluh thlong sying ïa ki nonghikai hynrei ki da leh sat ruh ïa ki da kaba pyndik bad pynslem kai ïa ka tulop jong ki haduh ban pynthiah miet syndon ha surok Secretariat bad wat ban siat tiar Gas ruh ïa ki nonghikai kiba pli.
Ym tang katta, u Chief Minister bad u Deputy Chief Minister leilei jong kane ka Sorkar MDA ki la kren kop sarong lypa ïa ki nonghikai ba kim lah shuh ban pyllait ba kin shim bynta ha ka kam saiñpyrthei bad lada ki kwah, ki ai jingmut pylleiñ pylleiñ ban leit sha ka Ingkashar. Dei tang kane ka Sorkar kaba shan khmat eh ïa ki nonghikai ha ki kyrdan bapher bapher.
Kane ka rai jong ka Meghalaya High Court ba donburom ban pynduh pyndam noh pyrshah ïa ki jingkwah rhah jong kine ki nongïalam ka Sorkar MDA ïa ki nonghikai bad ban ailad biang ïa ki ba kin ïa don bynta laitluid biang ha ki kam saiñpyrthei kumba mynshwa katkum ka jingsngewtynnad jong ki la dei ban ai ka jingïaroh bad jingsngewnguh sngewburom shi katdei eh.
Kito ki kynhun jong ki Nonghikai College kiba la rai kut khlem kyntiang dien ban ïakhun pyrshah ïa kum katei ka rai donbor bad ban beiñ ruh dei ban ai ka jingïaroh bad ka jingpyrto junom la junom. Hynrei, dang don bun bah ki jingdonkam ba dei hok ba ki nonghikai bym dei Sorkar ki dei ban ïoh.
Lada ka sorkar kam shah shkor ne leh bym suidñiew, imat, donkam shisha ïa ka Iingkashari ba kan tuklar lem sa ïa kiwei kiwei ki Hok ba ki nonghikai ki dei ban ïoh kum ka bai nong jong ka jingshakri hok jong ki ban ai jingstad ïa ki samla pule haduh ba kin da nang da stad ha ki kyrdan bapher bapher.