Shillong, Ïaïong 08: Ka Seng Hynñiewtrep Integrated Territorial Organisation (HITO) ka la pynrem jur ïa ka ïa ka Seng “Lawei Ba Phyrnai”, namar ka jingbyrngem pynbthei bom ha ki skul.
Ha ka kyrwoh ba la phah mynta ka sngi da u President, u Bah Donbok Dkhar, ïa kaba la ai da ka jingujor ruh sha ka DC East Khasi Hills District, Kong Isawanda Laloo halor ka jingpynmih khubor ïa kane ka kyrwoh jong kane ka Seng.
“Kaei ka jingthmu jong kane ka Seng haba ka kwah pynbthei bom ha ki skul, Hato kam pyrkhat shuh ïa ka jingim ki khynnah skul?”, la ong ka HITO.
Ka HITO ka la ther tyngeh ruh halor ka jingdawa jong ka ban pyllait noh ïa u MLA barim, uBah Julius Dorphang, uba la shah set phatok namar ki kam batbor jong u. Ka Seng ka ong ba ka jingkam jong ki ba kidei ki samla ba la nang la stad kadei kaba shu thok, namar ki briew kiba la nang la stad kim nym dawa satia ban pyllait noh ïa u briew uba lap miet ha ki kam leh beijot.
Ha kajuh ka por ka Seng ka dawa ba dei ban thwet ïa ki dkhot jong kane ka Seng, kiba shu pynmih khubor ban pyntieng pynsmiej ïa ki paidbah.
Lah ban kdew hangne ba ka Lawei Ba Phyrnai ha ka kyrwoh ba la phah sha ki katto katne ki kot khubor hynnin ka sngi, ba la phah da u Publicity Secretary ba khlem thoh kyrteng, ka la kam ba la phah da ka shithi sha u Myntri Rangbah ba kam ruh ba udei u nonghikai uba la shah weng kam noh namar ka jingtuklar u Conrad Sangma bad u Myntri ka tnad pule puthi u Bah Lahkmen Rymbui.
Ka Seng ka dawa ban pyllait noh ïa u Bah Julius Dorphang da kaba leit buh ïa u ha ISBT Mawïong, ka jaka pynsangeh Bus ba dang shu pyntreikam ha Mawïong ha ka por 10 baje mynmiet ha ka 9 tarik mynta u bnai, lym kumta kan pynbthei bom ha ka skul LP, ïa kaba ka khlem jer kyrteng.
Shuh shuh kane ka kyrwoh ka kam ba ruh ba ka Lawei Ba Phyrnai kadei ka Seng ba peit ban kyntiew ïa ka pule puthi ne ka Educational Society, hynrei mynta ki dkhot bad ki nongkyrshan ki la bret noh ïa u khulom ban kieng atiar da ki suloi AK-47.
Ka Seng ka la pynshrai ruh ïa u Myntri Rangbah ba ka IP Address kaba ka phah email, ka pynkylla na ka por sha ka por namar ka don u Soft Ware Engineer uba dei u Organising Secretary jong ka Seng.
