Kular ka BJP ban rah ïakren biang bad ka Sorkar India halor ka soskular pynbeit pud

Shillong, Ïaiong 08: Ka Bharatiya Janata Party (BJP) kala kular ban sa rah ïakren biang bad ka Sorkar India lem bad ki Nongïalam ka Party ha Delhi haba ïadei bad ka jingud jingnam jong ki paid Khappud halor ka soskular pynbeit khappud bala iasoi hapdeng ka Jylla Assam bad Meghalaya ban pynkut ïa ka jingïakajia ha ki 6 tylli ki jaka.
Kane ka jingkular kala mih na u Nongïalam bad Myntri barim ka Tnad ka Koit ka Khiah Bah A.L.Hek haba pyn tip ba ula ïoh pdiang ïa shibun ki shithi na ki Hima bad ki Dorbar Shnong kiba hap hapoh ki jaka ba ïakajia pud.
“Ngi la ïohi ïa ki jingud jingnam jong ki briew. Namar kata, ka dei ka kamram bad jingkitkhlieh jong ngi kum ki Nongïalam ban rah ïakren bad pyntip sha ka Sorkar India bad ki Nongïalam ka BJP ha Delhi” ula ong haba ïakren bad ki nongthoh khubor.
Haba pyntip ba ki don bun ki briew kiba kyrshan bad ba pyrshah ïa ka Memorandum of Understanding (MoU) ba ïa iasoi hapdeng ka Sorkar Meghalaya bad Assam, u Bah Hek ula ong ba ka Party kan sa nang lum shuh shuh ïa ki jingtip na ki shnong khappud.
Haba ïaid pyrshah ïa ka jingkren u Myntri Rangbah ka Jylla Assam Himanta Biswa Sarma ba ki artylli ki Jylla kim dei shuh ban nang khyllie ïa kane ka kam (MoU), hynrei u bah Hek ula pdiang ïa ka rai jong ki party ba iatreilang ha ka sorkar MDA ba dei ban shong bishar biang ïa ka soskular pynbeit pud.
“Nga pdiang ïa ka rai bala shim da kiwei pat ki party ba iatreilang ha ka MDA kum ka HSPDP, UDP, PDF kiba kwah ban shong bishar biang ïa ka MoU” ula bynrap.
Une u MLA ka Pynthorumkhrah ula ban jur ïa ka jingdonkam ban sngap lang ïa ka sur jong ki kynhun bapher bapher khamtam kito kiba shongshnong ha ki jaka khappud.
“Na kata ka daw nga ong ha phi ba ka jingïalang bad ki kynhun bapher bapher khamtam ki briew ba sah ha ki jaka khappud ka long kaba kongsan bha hashuwa ban shim ïa ka rai kaba khatduh” ula ong.
Haba kylli la ka don ka jingbym iatylli hapdeng ki party ba iatreilang ha ka MDA halor kane ka kam, u Bah Hek ula ong “ Phi la jubab hi da kaba kylli ïa kane ka jingkylli ba kam don ka jingiatylli hapoh ka MDA”. Hynrei ula ban jur ba ka Sorkar ka donkam ban khot iasyllok ïa baroh ki kynhun hashuwa ban shim ïa ka rai ba khatduh.
Kumba long mynta, kane ka soskular pynbeit pud ka ap satang ka jingmynjur jong ka Ïingdorbar Parliament. U Himanta dang shen ula pyntip ba ka kylla kaba ar jong ka jingïakren pynbeit pud ha ki 6 tylli ki jaka ba dang sah kan sa sdang noh ha u bnai Jylliew-Naitung.