Nongstoiñ, Nohprah 6: Ka seng Hynñiewtrep Youth Council ha ka jingïalam jong u samla Blastarland Sohmad u General Secretary jong ka Nongtrai Circle, ha ka sngi nyngkong ka la ïoh ban leit peit hi da la ki jong ki khmat bad ai jingïarap ïa kawei ka longïing, ba la shah thang dusmon ïa ka ïing kaba dei ka ïing jong ka Trisia Ïawphniaw na ka shnong Umkait.
Katkum ka jingïoh jingtip ki nongïalam ka seng HYC, la ïathuh ba ïa katei ka jingjia la kynnoh ba la leh da u lok barim jong ka u Bah Tailan Sangriang shnong Riangkang. Ka daw la ong ba ka dei na ka daw ba ki la ïa shong khlad la kumba mynta la lai bnai ei ei.
Kumta na ka liang ka seng ka pynpaw ka jingsngewkhia bad pynrem jur ïa u ne u briew, u ba la leh ïa kum kine ki jait kam ki bym ïahap shuh bad ka imlang ka sahlang, ha ka long briew man briew kaba pyntieng pynsmiej bad pynsuhjer ïa ki briew, khamtam ha ka dong ka thaiñ hi baroh kawei. Kane ka jingleh jong une u briew, na ka liang ka seng kam lah ban pdiang, namar ha kane ka dong bad ka thaiñ ym pat lap bad shem ïa kum kine ki jait kam.
Na ka liang ka seng ka kyrpad ïa ki briew jong ka aiñ ba kin pynshitom bad ai ka jingsneng ka ba tyngeh, khnang ba kan ym jia shuh ïa kum kine ki jait kam. Kumba la ïoh jingtip ba mynta la ïoh kem ïa utei u rangbah u ba la suba ba u la leh ïa katei ka kam.
