Shillong, ïaïong, 08: Kum shi bynta ka jingïasnohkti lang bad ka jingrakhe jong ka ri India ïa ka jingdap 75 snem ha ka jingïoh laitluid, ka Special Olympics Bharat Meghalaya Chapter mynta ka sngi Palei ka la pynlong ïa ka jingai jingsumar ei sha ki khynnah skul kiba don jingduna ha ki dkhotmet ïa kaba la pynlong ha Don Bosco Hall, Laitumkhrah, Shillong.
Ki doktor kiba ju sumar ïa ki jait jingpang bapher bapher ki kynthup naduh ki Dental Surgeon, ki Medical Doctors, ENT Doctor, ki doktor sumar khmat na ka Bansara Eye Care Centre, na NEIGRIHMS, na Ganesh Das bad kiwei kiwei ki jaka ai jingsumar kiba la ïashim bynta ban sumar ïa ki khynnah kiba la ïashim bynta kumba 230 ngut.
Kine ki khynnah skul ki dei kiba pule ha ki skul kyrpang ba la pynïaid da ka Bethany Society, ka Jyoti Sroat Special school, ka Dwar Jingkyrmen bad kiwei kiwei.
U Bah Michael Kharsyntiew uba long ruh uwei na ki nongtrei monsngewbha ha kane ka sngi u la noh synñiang ha kane ka jingai jingsumar ei ïa kine ki khynnah.
Ka Area Director jong ka Special Olympics Bharat Meghalaya Chapter ka Kong Christeen Nonghuloo, u Dr Freddie Kharmawlong uba peit ïa ka Medical Team bad ka Dr. Daffy Mukhim ki la ai khublei kyrpang ïa u Bah Michael Kharsyntiew halor une u synñiang ba u la noh sha kane ka kynhun.
