Shillong, ïaïong, 08: Ka kynhun ki Bookie ba pynthoh Teem ha kylleng ka nongbah Shillong bad ha ki shnong kiba don ha khap sor bad sha kiwei pat ki shnong kiba don hapoh ka jylla Meghalaya ki la kynnoh ba ka Khasi Hills Archery Sports Institute (KHASI), Shillong ka dang pynïaid ïa ka kam thoh teem wat hapdeng ka jingbym don license watla ki don tang lai tylli ki kynhun ha nongbah Shillong kiba lah ban pynïaid ïa ka kam thoh Teem.
U Bah Win Kharryngki bad u Bah Dines Lyngdoh ryngkat ka jingsynranlang jong kiwei kiwei ki Bookie ha ka jingïakren bad ki lad pathai khubor ha ka sngi Thohdieng ha Shillong Press Club (SPC) ki la ong ba katkum ka jubab ba ki la ïoh lyngba ka Right To Information (RTI) na ka ophis u Registrar of Cooperative Societies, Shillong la pynpaw ba ki don tang lai tylli ki kynhun kiba lah ban pynthoh teem ha nongbah Shillong ïa kiba la tip kyrteng kum ka Hynñiewtrep Indigenous Achery Organizer Institute (HIAOI), Shillong, ka Sengbhalang Ladrymbai Archery Club (SLAC), Ladrymbai bad ka All Garo Hills Archery Association (AGAA), Tura.
Ha kajuh ka por ki la buh jingkylli ruh ïa ka Sorkar Jylla ba balei ïa ka jingpynthoh Teem ha Mawngap kaba khlem Licence la khang pyrshah katba ïa ka KHASI pat ka Sorkar ka dang ailad ban pynïaid ïa ka kam thoh Teem ha Polo.
