Shillong, ïaïong, 08: Ka Hynniewtrep Youths Council (HYC) ka la kynthoh ba ka jingïasoi jong ka Sorkar Meghalaya bad ka Sorkar Assam ïa ka Memorandum of Understanding (MoU) ban ïapynbeit ïa u pud u sam ka long pyrshah ïa ka Instrument of Accession & Annexed Agreement.
“Ki Hima Khasi haba ki ïasnoh bad ka ri India da kaba ki soi ïa ka IOA& AA, la kular ïa ki ba ïa ka khyndew ka shyiap jong kine ki Hima yn ïada ha ka Riti Synshar jong ka ri India. Ka paragraph 20 jong ka Sixth Schedule ka la ai ïa kata ka jingïada. Hato mynta kane ka jingleh jong ka Sorkar Meghalaya ban soi ïa ka MoU bad Agreement ka long pyrshah ïa ka IOA & AA bad ïa ka Sixth Schedule?” la buh jingkylli ka HYC ïa ka Sorkar ha u kyrwoh ba la phah da u General Secretary u Bah Roy Kupar Synrem.
“Katkum ka riti dustur jong ngi kaba la ïada da ka Riti Synshar ka Ri India lyngba ka Article 13, Article 277, Article 372 bad ka Sixth Schedule, ka khyndew ha ka Bri u Hynñiewtrep ka dei ka jong ki riewshimet (Ri kynti ) lane jong ki kur, ki shnong, ki Raid bad ki Hima. Ym don khyndew Sorkar ha ka Bri u Hynñiewtrep lait noh kito kiba ki la da thied bad siew da ka dor ne kiba ki trai khyndew ki la shu ai sngewbha . Katkum ka section 41 jong ka Right to Fair Compensation and Transparency in Land Acquisition, Rehabilitation and Resettlement Act, 2013, ka Sorkar haba shim khyndew ha ki Tribal area jong ka Jylla Meghalaya ki hap pan jingbit na ki trai jaka bad ka District Council bad ka District Council ha shwa ba kan ai ka hap pan jingbit na ki Hima, ki Raid bad ki shnong,” ong u kyrwoh.
“Ka Sorkar Meghalaya katkum ka Aiñ ka hap pan jingbit na ki trai khyndew, na ki Dorbar Trai Ri bad ka District Council haba ka shim khyndew ha ki Tribal Area. Hato kane ka Sorkar ka lah mo ban ai kumba 18.46 Sq Km ka khyndew sha ka Assam khlem ka jingbit ki trai khyndew, ki Dorbar Trai Ri bad ki District Council? la kynthoh ka HYC.
Ka HYC ka pynpaw ba ka jingsoi MoU bad Settlement Agreement hapdeng ka Sorkar Meghalaya bad ka Assam khlem ka jingbit ki trai khyndew, ki Shnong, ki Raid, ki Hima bad ki District Council ka long kaba be-aiñ bad ka long ruh pyrshah ïa ka riti dustur jong u Khun Hynñiewtrep. Kane ka kam be-aiñ bad be-riti jong ka Sorkar Meghalaya ka la ktah shikadei eh ïa ka khyndew ka shyiap bad da leilei ngim lah ban pdiang ïa ka, ong ka seng ha u kyrwoh.
“Ka Seng ka lyngngoh ruh ban ïohi ha ki kotkhubor ba ki Party ba don lang ha kane ka Sorkar MDA kum ka BJP, UDP, PDF bad HSPDP ki kren pyrshah ïa kane ka MoU bad ki ong ruh ba dei ban pynbeit biang sa shisien ïa kane ka. Ka jingkylli kaba mih mynta ka long hato ïa ka MoU bad ka Agreement la soi khlem ka jingmynjur lang kine ki party ba donlang ha ka Sorkar ne kine ki Party ki sa babe hadien ba lap ba ka MoU ka long kaba dkhoh bad kaba bakla ne ki shu leh mynleh tang ban pynbiej pynthame ïa u paidbah? la kynthoh shuh shuh ka Seng.
“Ka HYC, sa shisien pat ka pynpaw ba ngi don ha ryngkat ki shnong, ki Raid bad ki Hima halor kane ka jingïapynbeit pud bad ngi dawa ba ka Sorkar Meghalaya mynta ka hap shim jingkitkhlieh bad khmih bniah bad pynbeit bha sa shisien halor kane ka MoU bad ka Settled Agreement,” la ong ka Seng.