Shillong, Ïaiong 08: U MLA ka Mawlai Constituency Bah PT Sawkmie ula pynpaw ba tang ki flyover ne ki surok suin ki dei kiba lah ban weng bad pynduna ïa ka jingdheng kali has nongbah Shillong.
Kat kum ka jingong jong u, ka Nongbah Shillong kala donkam kyrkieh ban don ïa ki fly over ha kylleng ki jaka haba khmih ïa ka jinglong jingman bad ka jingkhapngiah jong ki surok hapoh ka Nongbah.
“Ka Nongbah Shillong kam don lynti shuh ban nang lah pynheh ïa ki surok kiba don mynta.Wat ka surok National Highway ba ïaid napdeng eh jong ka sor ruh kam long shuh ban pynheh namar ka jingbym don jaka shuh. Ka lynti kam don shuh ba ngin lait na ki jingdheng kali lada ngim lab pynheh ïa ki surok” ula Ong.
” Namar kata, dei tang ki flyover kiba lah ban weng ïa kane ka jingeh jong ka Nongbah Shillong” ula bynrap. Une u MLA ula ong ba sorkar kan hap phaikhmat noh sha kane ka bynta haba ai jingmut ban tei ïa ki flyover kum na Umshyrpi sha Mawlai Mawiong, ha thain IGP Point, Laitumkhrah-Dhankheti bad kiwei kiwei ki jaka.
Lah ban kdew hangne ba u Bah Sawkmie ula phah teng ïa ka jingtyrwa sha ka sorkar ha ki snem bala leit noh ban tei ïa ka flyover ha Mawlai ka ban weng ïa ka jingdheng kali has shilynter ka surok Tirot Sing Syiem Road na jingkieng Mawlai shaduh sha Mawlai Mawiong.
