Khynra ka KSU ïa ki dukan bam ki bar jylla ha Ïewduh, Lap ïa ka jingjakhlia ba isaitmet

Shillong, ïaïong: Ki dkhot jong ka Khasi Students’ Union (KSU) ki ba don ha kane ka nongbah Shillong, kata kynthup naduh ki dkhot ka Mawprem, Mawkhar, Jaïaw bad Upper Shillong Circle ha ka 6 tarik mynta u bnai ki la pynlong ka jingkhynra ka ba kynsan kynsan ïa baroh ki dukan die sha die ja ki ba la shong bad pynïaid da ki bar jylla ki ba don ha ki bynta jong ka thaiñ Ïewduh.
Ha kane ka jingleit khynra ka Seng ka la lap ba jan baroh ki dukan jong ki bar jylla ki ba die sha jingbam bad dukan bamja ha Ïewduh ki dei ki bym don jingshngaiñ satia na bynta ki paidbah ki ba ju bam leit dih namar ka jingjaboh ka ba i sait met ha baroh ki liang. Ka Seng ka la lap ruh ba kitei ki dukan ki pyndonkam wat ïa ki jhur ki jhep ki ba la pyut, ka um sait um khlieng kila pyndonkam da ki um jaboh bad ka rukom shet rukom tiew ruh ka long kaba ijli bad i sait met haduh katta katta.
Ka Seng ka la ong ruh ka ba kham pynbitar shuh shuh ka dei nalor ba kitei ki dukan bar jylla ki buh jingma ïa ka ka koit ka khiah jong ki paidbah ki ba ju leit ban bam ban dih ha kitei ki dukan, hynrei na ka liang jong kitei ki nong pynïaid ïa kitei ki dukan ki dang nud ban shim kabu da kaba die palat ïa ka dor ka ba ladep mang lypa.
Khatduh, na ka liang jong ka Seng KSU ka la dep ban maham jur ïa kitei ki dukan bam ba ki dei ban long ki ba lehkhuid leh suba nangne shakmat khnang ba kan nym don kano kano ka jingma ïa ki paidbah ki ba bam badih bad kumjuh ruh ba kim dei satia ban die tam palat ïa ka dor ka ba lah buh.
Shuh shuh ka Seng ka la bthah ba lada dang lap ïa kum kine ki jait dukan nangne shakhmat kan ym map satia bad kan shim da ki synjam ba tyngeh.
Ha kajuh ka por ka Seng ka pynrem jur ruh ïa ka jingshim sting ki tnat ba dei khmih jong ka Sorkar (Food Safety and Standards) ka ba pynlong ban kynrei ki dukan bam jong ki bar jylla ki bym phikir satia ïa ka khuid  ka suba ha ki thain Ïewduh bad ha ki bynta bapher bapher jong ka nongbah Shillong.
Lyngba une u kyrwoh ka Seng ka kyntu jur ïa ki paidbah ba ki dei ban husiar bad adkar bha shuwa ban bam ban dih ha ki dukan ki bar jylla ki ba don ha ki thaiñ Ïewduh, Shillong khnang ban lait na kum kine ki dukan ki bym leh salia halor ka khuid ka suba bad ka ba lah ban wanrah ïa ki jingpang jingshitom ki ba harukom.
Na ka liang ka Seng ka pyntip paidbah ba lada don napdeng ki paidbah ki ba dang lap ïa kum kine ki jait dukan kiba jaboh ki dei ban pyntip marmar sha ka Seng khnang ba kan ïoh ban leh da ka ba donkam.