Shillong, ïaïong: Ka ophis jong ka State Tuberculosis Officer, Meghalaya ha kane ka sngi Palei ba la lah ka la pynlong da ka prokram pynshai paidbah hapdeng ki khynnah skul ha ka ba ïadei bad ka jingpang Tuberculosis (TB) shi bynta ka jingrakhe ïa ka “World Health Day,” ha ka jingïalang ba la pynlong hapoh BrooksideHigher Secondary School, Shillong.
La sdang ïa kane ka prokram da ka jingkren na I Bornali Nongrum, State Nikshya Operator ha ka ba ïadei bad ka jingrakhe ïa ka “World Health Day.” Na ka liang I Dr.Amica Rynjah, Assistant Programme Officer cum DR-TB Coordinator, i ba dei i Resource Person ha ka jingkren i la pynshlur ïa ki khynnah skul ba kin pynleit jingmut ha ka ban ithuh ïa ki dak ki shin jong ka jingpang TB bad ban shim ïa ki lad jingïada na kane ka jingpang.
Nalor ka I la ban jur ruh ba baroh ki dei ban ïasnohkti lang ban tip ha ka ba ïadei bad kane ka jingshitom bad ruh ban pynphriang ïa ki jingtip hapdeng ki nongshong shnong khnang ba yn lah ban rat dyngkhong ïa kane ka jingpang TB kat haduh ka snem 2025, ka ba long katkum ka jingbuh thong jong ka ri pyrshah ïa kane ka jingpang.
Shi bynta ban pynsngewthuh hapdeng ki khynnah pule, la pynlong ruh da ka jingïakop kyntip lyngba I Kong Tracy Kharkamni, State Coordinator, hadien bud da ka jingshim smai na ka bynta ban rat dyngkhong ïa kane ka jingpang TB da ki khynnah pule.
Hadien kane la ïoh ïa ka jingkren ai khublei na I Kong Vanessa Majaw, Bachelor of Social Workstudent, Women’s College. Kane ka long katkum u kyrwoh lyngba I Dr. M. Mawrie State Tuberculosis Officers, Meghalaya, Shillong.
