“Shen yn shna noh ïa ka lynti surok na Umphrew sha Nongkohlew”

Shillong, ïaïong: U MLA ka Mawlai u Bah PT Sawkmie ha ka sngi Palei ba la lah u la pyntip ba shen yn sa sdang ban shna noh ïa ka surok na shnong Umphrew sha Nongkohlew bad ba ka sorkar ka la dep mang pisa na ka bynta kane ka jingthmu.
U MLA u la pynpaw ïa kane ha ka jingïalang bad ki 10 tylli ki Self Help Group (SHG) kiba don hapoh ka shnong Umphrew ha ka jingdon ryngkat u rangbah shnong bah D. Sohshang, rangbah shnong barim bah E. Langstieh, ki nongïalam jong ki Village Organization bad kiwei kiwei ba la pynlong ha Umphrew LP School.
Nalor kata ha kane ka sngi u Bah PT Sawkmie u pyntip ruh ba un sa pynshna ïa ka ophis treikam jong ki SHG, kumba ki la ud la nam ha u bad un ai jingïarap ruh mar 5000 tyngka sha kine ki 10 tylli ki SHG.
Hashuwa kane u MLA u la leit ban jurip ïa ka skul Rosario Secondary School, Mawsiatkhnam na ka bynta ban pynkha kamra klas ïa kane ka skul bad kumjuh ruh ïa ka Mawsiatkhnam Presbyterian LP School na ka bynta ban maramot ïa ka.
Ha Rosario u MLA u la kular sha ki sister ba un mang na ka MLA skhim na ka bynta ban pynkha kamra klass bad kumjuh ruh u la ong na ka bynta ka Mawsiatkhnam Presbyterian ba kin pynmaramot ïa ka skul bad ban pynai rong ai rup ruh ïa ka, ïa kaba un mang naka skhim jong u.
Shuh shuh ha kane ka juh ka sngi u MLA Mawlai u la leit ruh ban ïa shim bynta kum u kongsan ha ka skul sports ba shisien shi snem jong ka Don Bosco Secondary School, Nongkohlew ha ka jing don ryngkat phadar T. Nonglang bad kiwei kiwei.