Shillong, Naiwieng 28 : Ka sorkar Meghalaya Democratic Alliance ka la pynkhreh ban buh bun tylli bha ki ktem pulit (border outpost) ha kylleng ki jaka khappud bad ka jylla Assam kiba ju don ki jingkulmar.
Haba pyntip ba katno tylli kin buh, ka sorkar jylla kan sa shim ïa ka rai ha ka jingïalang jong ka kynhun Myntri kaban long ha kane ka sngi Ba-ar, ong u Myntri Rangbah ka jylla, Conrad K Sangma haba kren bad ki lad pathai khubor hadien ka jingïalang bad ki nongïalam jong ki seng saiñpyrthei bapher bapher.
Shwa ban sdang katei ka jingïalang, ka la don ruh ka jingsngap jar kaba shipor ban sngewlem naka bynta kito ki lanot kiba la duhei ïa la ka jingim ha ka jingshah siat ha ki pulit Assam ha Mukroh ha ka 22tarik mynta u bnai.
“Lashai ka sngi (Sngi Ba-ar) ka kynhun Myntri kan sa rai ïa ki jaka bapher bapher kiba yn sa buh ia ki ktem pulit (BOP). Ngi la dep ruh ban syllok bad ki political party bapher bapher ba ngi la rai ba ngin buh noh ïa ki ktem pulit kiba pura ka jingbun briew nalor ki jingdonkam bapher bapher ha ki jaka ba ju don jingkulmar nalor kiwei kiwei ki jingdonkam ban pyntikna ba kitei ki Outpost kin treikam pura,” u la bynrap biang.
Nalorkata, u ong ruh ba ka sorkar ka la shim lut ki sienjam kiba donkam ban pyntikna ïa ka jingshngaiñ jong ki nongshong shnong kiba don ha khappud. Nalorkata, u la pyntip ruh ba ka sorkar ka la dep ruh ban thung ïa ka kynhun dohkit (Judicial enquiry) kaba la khlieh da u Justice T Vaiphei.
Ha kane jingïalang, u Myntri Rangbah u la pyntip ruh ba ka sorkar ka la dep weng ïa ka jingkhang internet nalor ba ki la ailad ruh ïa ka leit ka wan kaba laitluid jong ki kali ryngkat ka jingpahara jong ki pulit.
Shwa kane, u Conrad u la ïathuh ruh ba ka sorkar ka la pan jingmut ruh na baroh ki nongïalam kiba wan ha katei ka jingïalang ha kaba baroh ki la dawa ba dei ban leh ei ei noh mardor pyrshah ïa kito kiba donkti ban siat ïap ïa ki hynriew ngut bad ruh ba dei ban siew bai luksan sha kitei ki longïing ba kynduh ïa katei ka jingjia ba sngewsih.
U la ïathuh ruh ba na ka liang u Myntri Kampohïing ka Ri, u Amit Shah u la kular ruh ïa ka kynhun jong ki Myntri Sorkar dan gshen ba ka sorkar pdeng kan thaw mardor ïa ka kynhun tohkit ne ka central investigation agency.
“Shuh shuh u ong ruh ba na ka liang u Amit Shah u la kular ba mardor kin sa leh noh bad na ka liang ka Meghalaya ruh ki la banjur ba dei ban leh noh kham kloi. “Hynrei shen ngan sa kren ïa u Home Secretary halor katei ka bynta,” u la bynrap biang.
Nalorkata, u Myntri Rangbah u la ïathuh ruh ba ka sorkar ka la rai ruh ban pynskhem syndon ïa ka pyrton pulit kaba don ha ka shnong Mukroh. “Ïa kane ngin pynskhem bad kin ïai don hangtei namar ngin ym weng shuh ïa ki na katei ka jaka,” u la ong.
U la ïai ban ruh da kaba ong ba ka shnong Mukroh ka dang hap ha Meghalaya. “Wat ha ka kaiphod 2011 ruh ka kdew shai ba ka Mukroh ka hap ha Meghalaya.” Nalorkata, u ong ruh ba wat kito ki shnong kiba don shakhamt ka Mukroh kum ka Psiar bad Khanduli kiba dei ki shnong kajia pud bad shaneng shuh shuh pat sdang sa ka Block 1 – II. Kumta u ong ba halor kitei ki nongrim, ka Mukroh ka dang hap bha ha Meghalaya.
U Myntri Rangbah u la pynkynmaw ruh shaphang ka jingïakhun ban ïoh pynbeit pura noh ïa u pud u sam kadei namar kitei ki jingjia shah thombor bad ruh halor ka jingeh kaba ki paidbah ba sah ha khappud ki ïai mad na ka por sha ka por. U la ïathuh ruh ba baroh ar tylli ki sorkar jylla ki ïai bteng ban buddien ban pyntikna ba kino kino ki jingkynad ban tehlakam mardor bad ruh ban ym ailad ba kan khihwin biang.
