Shillong, Naiwieng 28 : Sa ka BJP ka la dawa ba u myntri kam pohïing ka jylla u ma Lahkmen Rymbui u dei ban hiar shuki noh mar mar halor ka jingjia shah siat iap ki san ngut ki nongrep ha Mukroh ha ki pulit Assam ha ka step 22 tarik mynta u bnai.
U National Secretary ka BJP u Rityraj Sinha u la ong “U myntri kam pohïing u dei ban shim ka jingkitkhlieh halor kane ka jingjia bad hiar shuki noh mar mar namar um lah ban ai ka jingïada ïa ki paidbah”.
U la ong ba ki pulit ha ka jylla Meghalaya ki bunkam tang ha kane ka nongbah Shillong bad ki khlem ai jingïada ïa ki paidbah sha ki nongkyndong. U la ïathuh ba u la leit sha Mukroh bad ïa kynduh ïa ki long ïing kiba ngat ha kane ka apot. U la kynnoh ba kiba bun ki seng saiñ pyrthei kim salia namar ki khlem leit sngewlem ïa ki long ïing kiba ïa kynduh ïa kane ka jingjia ba sngewsih.
U dawa ba ka sorkar ka dei ban leh da kaba tyngeh ïaki pulit Assam. U la ong lada ki pulit ka Assam ki ïaid tam pud, ka aiñ kam dei ban map ïa ki. U la ïathuh ba ka kynhun jongka BJP hapoh ka jingïalam ubah Ernest Mawrie kin sa leit ïa kynduh ïa u myntri rangbah ka Assam u Himanta Biswa Sarma ha ka 30 tarik mynta u bnai khnang ban kyntu ïa u ban shim khia lang halor kane ka kam.
U la kyntu ïa ka sorkar Meghalaya ba kan ai kam ïa kiba haïing ne ki khun ki kti jong kiba la shah siat iap. U la kyntu ïa ki paidbah ka jylla ba kin ym leh da ki kam ïa umsnam namar kane kam ïalam ne wanrah ïa u soh ka jingjop. U kular ba ka BJP kan ai ka jingkyrshan ïa ka sorkar Meghalaya bad Assam ba kin pyndep kloi ïa ka kam ia pynbeit pud.
U la ong ka shongsuk shongsaiñ ka dei ka kam jong ka tnad kam pohïing bad u myntri u dei ban shim ka jingkitkhlieh halor kane. U la ong ba ka BJP kam kwah ne ngeit ha ka jingsynshar President ka kwah da ka jingsynshar paidbah bad ka rai ka dei jong ki paidbah.
