Katba nangmih ki sngi ki ïa,katta la nang paw pew pynryngkew ka jingaili palat kane ka sorkar MDA hapoh ka jingïalam jing ka party NPP ha kane ka jylla Meghalaya jongngi.
Teng teng,ym da dei eh ba ki tlot hynrei,i kumba ki da leh khnang artad ruh da ka jingmut jingpyrkhat ka bym khuid satia.Ki shu leh mynleh ban her Delhi tang ban shu pynthamme kai ïa ki paidbah ba biej kiba pli ïoh shah woh kjat ei ha ka MLA election kaban sa long shen sa kumba 3 bnai ei ei mynta.
Kawei ka jingpyrshang kane ka sorkar MDA ban buhrieh ne tap eit miaw ïa ki nongpynïap ne nongsiat briew kadei rukom leh sianti ïa ki nongsiat briew kiba pynïap ei kha-ma-kha ïa u (L)Bah Cheristerfield Thangkhiew ha Mawlai.La dawa tyngeh da ka ‘Sur u Paidbah’ ban sei madan ïa ki nongsiat ïa une u rangbah hynrei kane ka sorkar ka la shu leh mynleh kamkai pynban kat ïa ka kam ïap kam im ruh.Ka wanrah pynban kata ka report ha Assembly ka bym shai bad bym don jingshaniah da kaba buhrieh noh pynban ïa ki katto katne ki jingshisha.Lada ka sorkar kam kwah ban kem ïa ki nongpynïap briew,ka tyrud ka smer na sha lyndet ka peit kliaw ban ïoh bam briew biang (la kumba long u Rakot)shisien ba ka sorkar ka pynshlur (encouraged) ïa ki kam sniew(criminals).
Kane ka pyni shai ruh ba,imat ki khlieh duh nongsynshar jong kane ka sorkar MDA hapoh ka jinglamkhmat ka NPP ka lah ban don bynta lang(involved) shisha ha kaba phah siat ïap ïa u (L)Bah Che ha Mawlai namar wat lada dawa bad pynlong jingïakhih tyngeh ka ‘Sur u Paidbah’, man ka teng ruh,kam da satia bad kam da patiaw satia.Imat ki tieng ïoh shah kem pynban ïa lade.Lada dei ïa ki riew paidbah ne ki dkhot ki seng bhalang,wat tang iba rit ruh ki phah pulit man ka sngi katba ym pat ïoh kem ne set phatok ïa ki.
Ka jingleh kuman jong kane ka sorkar ha ka jingïap tyrud u (L) Bah Che ka la pur sted noh tang hapoh shisnem ei ei sa ha shnong Mukhroh,West Jaiñtia Hills dangshen.Shisien ba bym lah ban mait(pynkhuid) tyrud, ka tyrud ka smer ka ju pur raibi bad trei sted noh hi khlem da pynslem than.Ka jingshah siat ïap jong ki 5 ngut ki para doh para snam ha shnong Mukhroh dangshen ruh, ngi sheptieng ba ioh dei na katei ka jingïa shah liang ka sorkar ïa kito ki nongsiat briew ba ïoh ki shim khnang (intentionally) ïa ka mynsiem ba kordor jong u (L) Bah Che ha Mawlai.
Lada ka sorkar Meghalaya kam lah ban phah kem bad set phatok sa ia ka jingjia ba itriem bad ba isangsot ha Mokhroh, sngew sheptieng ba ïoh ka tyrud ka smer ka ïai pur raibi biang ha ka ri jongngi. Namarkata,dei tang ki paidbah kiba lah ban mait tyrud noh shi syndon da kaba pynrem ne pynliem lut ïa kine baroh ki nongsyn-shar,ki nongialam bad nongmihkhmat jong kane ka sorkar MDA ha kane ka MLA elekshon kaban sa long shen ha u snem 2023.Lada ki paidbah ki dang khein jem ne shim sting ïa kane,ka tyrud ka smer kam ju salia.
Shu sngew ma shibun ba ïoh ka wan jia sa sha ka ïng ka sem jongno jongno.Da husiar bha paidbah!! ïa kane ka thma kaba rieh bad kaba ngen kaba wan jia na ki Bor ba na sha lyndet(super natural power).Wat pyrkhat da kumwei pat,hynrei mait tyrud noh namarkata, khnang ban eh noh ka bok ka rwiang,ban ïeng biang ka ksaw ka kpong bad ka burom ka ijot jong ka jaitbynriew jongngi.
