Guwahati, Naiwieng, 28: U Chief Executive Member (CEM) jong ka Karbi Anglong Autonomous Council (KAAC) u Dr. Tuliram Ronghang ha ka Sngi U Blei u la pynbna ïa u nongpahara khlaw u Bidyasing Lekthe kum u “Karbi Hero’ uba la duhei ïa la ka jong la jingim ha ka jingsynreit kuli jong ki Pulit bad ki nongpahara khlaw ïa ki paidbah ha ka shnong Mukroh, West Jaiñtia Hills District ha ka step 22 tarik mynta u bnai.
Ha kane ka jingjia, hynriew ngut ki briew ba kynthup ïa ki san ngut ki Pnar na ka shnong Mukroh, West Jaiñtia Hills bad uwei u nongpahara khlaw na ka jylla Asam ki la duhei ïa la ka jingim ha kane ka jingjia hadien ka jingïakthong ïa kawei ka trok kit dieng be-aiñ da ki nongpahara khlaw bad ki Pulit na ka Jylla Assam.
Tang shu wan phai na Delhi, u Chief Executive Member ka KAAC u la leit jngoh ïa ka ingsah jong u Lekthe ha ka shnong Jaluk Langteng, West Karbi Anglong District bad ban sngewlem ruh ïa ki bahaing hasem jong une u nongpahara khlaw.
Ïa u Dr. Ronghang la synran lang da u Myntri ka tnat Hill Development u Jogen Mohan.
Hadien kane ka jingjia ha ka shnong Mukroh, u Myntri Rangbah ka Jylla Meghalaya, u Conrad K. Sangma u la kynnoh ba ki Pulit Assam bad ki nongpahara khlaw ki la rung shapoh u pud u sam jong ka Jylla Meghalaya bad siat kuli be-aiñ.
Ka Sorkar Pdeng ka la mynjur ban thung ïa ka jingtohkit halor kane ka jingjia da ka Central Bureau of Investigation (CBI) hadien ka jingkyrpad jong ka Sorkar Meghalaya bad ka jingkyntu jong ka Sorkar Assam.
Kane ka jingjia, ka la pynmih ruh ïa ki jingjia kiba la ktah ïa ka leit ka wan jong ki paidbah hapdeng ka jylla Meghalaya bad Assam.
Naduh ka sngi Baar jong ka taiew baladep, ki la mih ki jingjia kiba pynshong syier bha ha nongbah Shillong na ki jingïakhih jong ki kynhun sengbhalang kiba la dawa ïa ka Sorkar Meghalaya ba ka dei ban phah kem ïa ki Pulit bad ïa ki nongpahara khlaw kiba donkti ban siat ïap ïa ki san ngut ki nongshong shnong jong ka shnong Mukroh bad ban tian bishar ruh katkum ki kyndon aiñ jong ka ri.
