Shillong, Naiwieng 27: Ki nongpynïaid jong ka World Bank ba dei peit ïa kane ka jylla jong ngi kiba la hiar jurip ïa ki jingpyntrei ba ka la bei tyngka na bynta ki kam pynroi ha ka shnong Phudmyrdong kaba hap hapoh Mawphhlang C&RD Block ki la ai jingïaroh ïa ka jinglah jong ki ban pyntrei hok ïa ki skhim kiba ka la bei tyngka namar ka jingpyntrei ka long kaba paka bad ka jinglah ban buh ïa ki jingkheiñ jingdiah ïa ka jinglut jingsep na bynta kine ki skhim.
Kine ki nongtrei ka World Bank kiba la hiar jurip ha ka 22 tarik ki kynthup ïa u Pyush Droga ha ryngkat ka jingïadonlang kiwei pat ki nongtrei jong ka World Bank.
Ki kam pynroi kiba ka shnong Phudmyrdong kiba ka World Bank ka la bei tyngka ki long kum ka jingpynïoh ïa ka umbam umdih, ka jingker ïa ki lyngkha rep na ka jingshah rong ha ki wah bad ka umsaw ha ka por ka um ka heh bad kumjuh ïa ka jaka buh ïa ki symbai jingthung jingtep ne ki Seed bank, ka jingpynjyrngam biang ïa ki jaka ba la syllen bad kiwei kiwei.
Ka jingpyntrei ïa kine ki kam pynroi jong ka la peit la khmih da ka Community Led Landscape Management Project. (CLLMP), Meghalaya.
Haba ai jingkren u Pyush Dogra ha kane ka sngi u la ong ba ka jinglah ka CLLMP ka long kaei karei kaba dei ban ïaroh khamtam ka jinglah jong ki ban buh ki jingthoh kiba don ki sakhi satar da ki video ïa ka jingpyntrei jong ki bad ki dur bad ki cash memo ruh ban sakhi ïa ka jingpyllut pynsep ha ka jingpyntrei ïa kane ka mang tyngka.
U la ai jingïaroh ruh ïa ki nongtrei ka District Project Management Unit ïa u Pynshngaiñ, u Samla Kynmaw Phanbuh bad kiwei kiwei kiba la trei shitom na bynta ka jingpyntrei ïa kine ka kam pynroi.
