Shillong, Naiwieng 27 : Ka Karnataka ka dang lamkhmat ïa ka Meghalaya ha ka jingkamai ron ha ka jingïalehkai kaba la ïaid ar sngi jong ka lympung ïalehkai U-19 CoochBehar Trophy ha ka jingïalehkai ha madan ïalehkai kriket ka MCA ha Polo, Shillong.
Hynne ka sngi U Blei, ka Karnataka ka lah ban ïalehkai bha ha ka jingkamai ron bad duh lut baroh ki wicket. Haba bteng biang ïa ka 130/1 ban beh ïa ka thong jong ka Meghalaya kaba tied nyngkong bad kamai 157 ron duh lut baroh ki wicket, ka Karnataka ka la lah ban teh lakam na ki bol ba la kawang da ka Meghalaya bad kynjoh sha ka jingkamai 551, ha kaba u Vijayaraj u la kamai haduh 250 ron bad neh wicket haduh kaba kut.
Hadien ka jingkamai ba 100 ron, ïa ki arngut ki rangtied bol ka Karnataka kiba kama ron lang la ïoh ban pynhap wicket da u Sachin Kumar ba kynthup ka wicket u Swaroop S Hipparagi uba kamai 99 ron lyngba ka lbw bad ka wicket u Prakar Chaturvedi ba la ïoh kem da u Bosrang R Marak uba kamai 47 ron.
Ki rangkawang bol ka Meghalaya ki la thaw ki buit ki lynti ban ïoh pynhap wicket hynrei ka Karnataka lyngba ki arngut ki la lah ban bteng kamai ron. Kitei ki arngut ki kynthup u Vijayaraj bad u Dhruv Prabhakar (72 not out), kiba la buh ka jingkamai ba 215 ron. U Vijayaraj udei u rangtied uba la neh skhem marwei da kaba kamai 250 ron da kaba khyrwit 39 tylli ki four bad lai tylli ki six na ki 255 bol.
Ka Karnataka ha ak inning kaba nyngkong ka la lah ban lamkhmat da 394 ron katba ka Meghalaya ka la tied ïa ki khyndai over bad kamai 12/1.
U Mrityunjay Bharali, u kamai 8 ron (not out) ha ka jingkamai ron bad u Avinash Rai uba ïoh 4 ron. U Jeremiah Lyngdoh Kynshi uba la mih madan u khlem pat kamai ron ha ki 10 bol haduh kaba kut jong ka jingïalehkai hynne ka sngi. Ka jingïalehkai ka neh sa ar sngi, ka Meghalaya ka duna sa 382 ron na ka Karnataka.
